«Немда тӱҥалтыш вер-шöрым йытырайымаш» экологий акцийыш ушно!

Шарнеда, ынде кум ий почела «Саскавий» марий ӱдырамаш ушем «Немда тӱҥалтышлан вуйсавыш» тӱвыра-экологий акцийым эртара. Икымше гана тудо Кужэҥер район Халтурино ял воктене Немда эҥерын тӱҥалтышым налме верыштыже лийын. Тиддеч вара У Торъял, Шернур районлаш мийыме. Но кажне гана вес кундемыш кайыме деч ончыч Немда тӱҥалтышыш пурен лектына. Тушто онаеҥ Вячеслав Актуганов онапум палемден. Куэ пушеҥгыш тӱрлеман солыкым сакыме. Тыште кажне гана толмо годым, сортам чӱктен, Юмым пелештена, Вӱд Авалан тауштена.

Тиде кумдыкыш кум ий коштына, но чодыра лоҥгаште верланыше онапу, Немдан тӱҥалтышыж деке каяш корно уке гаяк. Куштыра кушкеш, тошто пушеҥге-влак йöрлыныт. Чыла тидым эрыкташ кӱлеш.

Тыге 2015 ий 3 октябрьыште (шуматкече) «Саскавий» марий ӱдырамаш ушем Немда тӱҥалтышым йытыраяш лектеш. Тиде сомылым ворандараш чыла кумылан ушнен кертеш. 10 шагатат 30 минутлан «Кужэҥер» манын возымо меҥге воктене вашлийына, вара Халтурино ял воктеке, Немда тӱҥалтышышке корным такыртена.

Ушныза! Йырым-йырысе пӱртӱсым аралышаш да йытырайышаш улына. Тугеже шушаш шуматкечын 10 шагат 30 минутлан «Кужэҥер» манын возымо меҥге воктене вашлийына.

Автор: Эльвира Куклина.