Саскавий: «Пӱртӱс эмла» проект дене Морко район вашлие

Вход на сайт

2015 ий 26 сентябрьыште «Саскавий» марий ӱдырамаш ушем Морко велыш миен кошто да тусо ӱдырамаш-влак дене вашлийын, кӱлешан да пайдале вашмутланымашым эртарыш.

Мутат уке, верысе калык уна-влакым кинде-шинчал дене вашлие, сылне муро дене кумылым савырыш.

Морко тӱвыра полатыште «Тачысе илышыште ӱдырамашын рольжо да верже» йыргешке ӱстел лие. Тудым «Саскавий» ушемым вуйлатыше Ираида Степанова вӱдыш. Алмаштышыже, Марий Элысе тӱвыра, печать да калык-влакын пашашт шотышто министрын алмаштышыже Галина Ширяева фотопрезентаций полшымо дене марий ӱдырамаш ушемын пашаж дене палдарыш.

Кумдан палыме марий диктор Роза Рябцева «Саскавийын» «Мый улам марий ӱдырамаш» проектше нерген ешарыш. Шымлызе Галина Шкалина самырык-шамыч дене пашам виктарыме шотышто ойлыш. Поэтесе Мардан Рая почеламутым лудо.

Верысе-влак деч Эльвира Евгеньева Шорыньжа велне почылтшо у тӱвыра комплекс, ялысе туризмым вияҥдыме шотышто мутым тарватыш.

Вашлиймашын кокымшо ужашыже - «Саскавий» марий ӱдырамаш ушемын «Пӱртӱс эмла» проектше кышкарыште шудо дене эмлыше Валентина Бутылкина дене ушан ойым вашталтымаш.

Валентина Павловна Бутылкина Ежово селаште агроколледжыште зоотехниклан тунемын, Москошто кӱшыл партий школым пытарен. «Агробизнес» институтыштат шинчымашым поген, агроном специальностьым налын. Тыге эм шудо-влак нерген ятыр пала.

Жапше годым колхоз председательланат пашам ыштен. Калык дене кутырен мошта, шкежым кучен мошта, шуко палыше ӱдырамаш.

А 2006 ий гыч шудо дене эмлыме сомылыш тӱрыс куснен. Тудо чылажымат Юмо дене кылда. Шудым погаш тӱҥалме годым Юмылан эре пелешта. Шудо, чодыра дене кутыра, егерь-влак дене мутым вашталта – кушто могай шудо кушмо нерген умылкала. Шагал вашлиялтше шудо-влакым пога, Абхазий мартеат нуным погаш коштеш. Но тыгодым чыла тӱред каяш огеш вашке, вес ганаланат, вес ийланат кода.

Тыгак тылзе шотым онча. Вожым катлыше тылзе годым пога, пеледышым, шудым – тичмаш тылзе годым. Эмлалташ катлыше тылзе годым тӱҥалман.

Ушан ӱдырамаш палемда: химиян кочкышлан оксам кышкена, вара химий деч эмлалташ шийвундым пытарена. Шоныза мом кочкыда! Кöргым эреак эрыктыман.

Валентина Бутылкина ятыр йодышлан вашештыш. Палемдыман, тудын деке шуко еҥ эмлалташ толеш. Теве шукерте огыл Россий кӱкштыштö чапланыше мурызо Стас Михайлов эмлалтын.

Валентина Павловнан мöҥгыштыжат лияш пиал шыргыжале. Тушто тудо ӱдырамаш-влакым погымо шудыж дене палдарыш.

Монча ӱмбалныже кылда дене шудо кошка. Кошкышыжым коробкылашке опта. Тӱредеш да фасоватла. Да, посна пöлемыште шудо, вож, саска… аралтыт. Чыла тидым Морко, Параньга пазарыште ужала.

Эм шудо нерген шуко уым пален налмеке, «Саскавий» ушемлан Морко мучко экскурсий лие. Ӱдырымаш-влак Будда храмым ончальыч, тоштерыш, музыкальный школыш мийышт. Кок памашыш тамле вӱдым подылаш волышт. ЗАГС воктене Морко сӱаным вашлийыч.

Чынжымак, мотор шыже кече пайдалын эртыш, шуматкече кӱлешан вашлиймашлан поян лие.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.