«Мастарлык йолгорно» передачыште самырык этножурналист-влак

Вход на сайт

2015 ий май гыч Марий Эл радиошто у передаче йоҥгаш тӱҥалын. Тудо «Мастарлык йолгорно» маналтеш, вӱдышö – Татьяна Светлакова (Соловьёва), поэтессе, «Поэзий шепкаште» сылнымут ушемым вуйлатыше.

«Мастарлык йолгорно» передачыште сылнымут, возымаш паша дене кылдалтше тӱрлö йодышым каҥашат, ой-каҥашым пуат. Почеламутым, пьесым, ойлымашым, йоча произведенийым кузе возымо нерген ойлат. Мут ден сем кокласе кыл, мурылан мутым чын возымо нергенат мутланат. Теве посна передаче псевдонимлан, кузе тудым ойырымо йодышым рашемдаш пöлеклалтын. Почеламутым сылнын лудмо нергенат ойлат. Конкурслаште вийыштым тершыше-влак дене вашлийыт. Марий Эл деч тораштырак илыше автор-влакым йöн лийме семын передачыш ӱжыт.

Тиде пагытыште «Мастарлык йолгорнышто» поэтессе-влак Валентина Изилянова, Альбертина Иванова, Альберт Васильев, Юрий Соловьёв, Мария Илибаева, Светлана Григорьева, Татьяна Пчёлкина, Надежда Никитина, Геннадий Сабанцев-Ояр, сӱретче Иван Ямбердов, журналист Эдуард Иманаев, композитор Иван Егоров, драматург Валерий Григорьев, артистка Маргарита Медикова да тыгак самырык автор-влак лийыныт.

«Шукыж годым передаче сылнымут урок семын эрта. Произведений-влакым лончылена, пример-влакым ончена: почеламутым, мурым, ойлымашым, пьесым шергалына. Кусарымаш пашалан жапым ойырена. Тыгай передаче-влак возымо мастарлыкым шуараш полшат, нуным шкешотан мастар-класс-влак манаш лиеш», - иктешла Татьяна Светлакова.

«Мастарлык йолгорно» передаче кажне кушкыжмын 11.00 гыч 12.00 шагат марте вияш эфирыште эрта.

Тыге, 8 сентябрьыште «Мастарлык йолгорныш» «Арслан» этнокультур интернет-журналын журналистше-влак мийышна: Эльвира Куклина, Анна Васильева да Анастасия Галиева. Ме «Арслан» журнал, Самырык этножурналист школ нерген ойлышна. Шарналтышна кузе чыла тӱҥалын, тачысе лектышна дене палдарышна, эрласе паша радамнамат шергална.

Передачым сылне муро-влак сöрастарышт. А мучаште Настян кокаже Параньга район гыч йыҥгыртыш, ончыкшымат вияҥаш тыланыш.

Ик шагаташ эфир писын эртен кайыш. Мыланна тиде передачыште моткоч келшыш. Тек умбакыжат «Мастарлык йолгорно» сылне, оҥай да пайдале лиеш.

Автор-влак: Анастасия Галиева ден Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.