Кеҥеж пагытнам пайдалын эртарена

Марий Эл Республик Шернур район Кугу Мушко тÿвыра пöрт пелен марий йылмылан пöлеклалтше мероприятий-влак эртышт. Тушко кеҥеж канышыште улшо йоча-влак ушнышт.

Кок кече вашлиймаш-влак лийыч. Икымше кечын марий калыкын эртыме да вияҥ толмо корныж дене палдарыме, видеом ончымо. Йоча-влак шочмо йылме нерген шонымашыштым ойлышт. Нунын коклаште иктат марий йылме деч ок вожыл. Чыланат марла мутланат.

Кокымшо кечылан кумдарак программым ыштыме. Марий мурызо, писатель-влак нерген каласкалыме, газет ден журнал-влакым шергал лекме. Ӱдыр-рвезе-влакым почеламутым лудаш ÿжмö. Ондак öрмалгышт гын, вара тиде койыш йомо. Кажныже почеламутым чон почын лудо.

Марий ÿдыр изинекак тÿрлен моштышаш. Кызытсе илышыште гына тиде кидпаша мондалташ тÿҥалын. А ме угыч шарналтышна. Марий кугыжаныш университетын тунемшыже Валентина Чемышева тÿрлаш туныктыш. Тиде сомылым чыланат тыршен шуктышт.

Паша деч посна мурен-кушташат, модашат монден огынал. Икымше кече гычак вÿд йоген, шергаш шылтен модынна. «Кандырам пунен» кушташ тунемме. Ах, нойымеш вет куштымо.

Кок кече йоча-влаклан моткоч пайдале лие. Нуным шуко сай пашалан туныктымо. Чыла тиде поро шарнымашым кодыш. Ончыкыжымат пырля погынаш, веселан жапым эртараш икшыве-влак тореш огытыл.

Мыланнат, студент-шамычлан, кеҥеж пагытым кÿлеш семын эртараш сай йöн. Молан яра да арам жапым йомдараш!?

Автор: Вероника Мустаева, самырык этножурналист.