Теве тыгай лийшаш тачысе самырык ончылъеҥ!

2015 ий 29 июльышто Марий Эл Республикым вуйлатышын пашажым жаплан шуктышо Леонид Маркелов 2015-2016 тунемме ийлан Марий Эл Республикым вуйлатышын стипендийже-влак нерген кÿштымашым кидпалыж дене пеҥгыдемден. Тушто мемнан коллегынат уло! Тиде - «Арслан» этнокультур интернет-журналын чолга журналистше, Самырык этножурналист школын еҥже, «Самырык этножурналист» регион-влак кокласе самырыктукым ушнымашым вуйлатыше Максим Алгайкин.

Максим, уло кумыл дене саламлена. Ме тый денет кугешнена. Теве тыгай лийшаш тачысе самырык ончылъеҥ.

Марий Эл Республикым вуйлатышын кÿштымашыжым «Марий Эл» газет савыктен.

Марий Эл Республикым вуйлатышын стипендийжым пуаш ыштыме шотышто «Марий Эл Республикым вуйлатышын стипендийже-влак нерген» Марий Эл Республикым вуйлатышын 2013 ий 26 апрельысе 74-ше №-ан Указше дене ыштыме Эксперт советын темлымашыж негызеш:

1. 2015-2016 тунемме ийлан Марий Эл Республикым вуйлатышын стипендийже-влакым палемдаш:
а) кугыжаныш профессиональный образовательный организацийлаште, кÿшыл образований кугыжаныш образовательный организацийлаште кыдалаш профессиональный образованийын образовательный программылаж почеш тунемше-влаклан:

Максим Григорьевич Алгайкинлан – Марий Эл Республикын «И.К. Глушков лÿмеш Оршанке педагогический колледж» кыдалаш профессиональный образовательный учрежденийыштыже тунемшылан…

Тиде спискыште кÿшыл образований кугыжаныш образовательный организацийлаште кÿшыл образованийын образовательный программыже – бакалавриат программе, специалитет программе, магистратур программе почеш тунемше-влак; ешартыш образованийым пуышо кугыжаныш организацийлаште ешартыш образовательный программе почеш тунемше-влак; кÿшыл образований кугыжаныш образовательный организацийлаште докторантурышто ямдылалтмашым эртыше еҥ-влак улыт. Чылаже – 57 еҥ.

2. Марий Эл Республикын Минфинже 2016 ийлан да 2017 ден 2018 ийласе плановый жаплан Марий Эл Республикын республиканский бюджетшым чумырымо годым Марий Эл Республикым вуйлатышын стипендийжым тÿлаш кайышаш финанс средствам шотыш налаш.

3. Марий Эл Республикын Минобрнаукыжо, Марий Эл Республикын Минздравше, Марий Эл Республикын Минкультурыжо да Марий Эл Республикын Минспортшо ойырымо средствам палемдыме пашалан кучылташ йöным ыштышаш улыт.
4. Марий Эл Республикым вуйлатышын стипендийже дене палемдалтше тунемше ден еҥ-влакын спискыштым массовый информаций средствылаште савыкташ.

5. Тиде кÿштымаш шукталтмым терген шогымо пашам Марий Эл Республикын правительствыжын председательжын алмаштышыжлан, Марий Эл Республикын тазалыкым аралыме министрже В.В. Шишкинлан ÿшанен пуаш.