Озаҥ олаште Вÿд дене тÿнямбал 16-шо чемпионат эрта

2015 ий 24 июль гыч 9 август марте Озаҥ олаште Вÿд дене тÿнямбал 16-шо чемпионат эрта. Тушко 190 эл гыч 2790 спортсмен ушнен. Кок тÿжем наре волотёр пашам ышта. 23 еҥ - Марий Эл Республике гыч. Нунын коклаштак - марий ÿдыр, туныктышо Татьяна Япаева. Тудо мемнам, «Арслан» журналын йолташыже-влакым, чемпионат кöргысö илыш дене палдарен шога.

Чемпионатыште волонтёр-влак шуко тÿрлö пашам шуктен шогат. Теве организатор-влаклан полышкалат: технике шотышто оператор пелен улыт, «фотопозицийыште» тыршат, зритель-влакым пуртат да нунын кумылыштым трибунышто нöлтат, таҥасымаш дене кылдалтше увер-влакым пырдыжыш савыктен пижыктат, а спортсмен-влакым черет дене «заплывыш» колтат...

Мыланем 28 июльышто эртыше таҥасымаш оҥайын чучо. Тиде кечын ÿдырамаш-влак 10 меҥгым ийыч. Комментатор Андрей Кондрашовын каласымыж почеш, тыгай кужу дистанцийыште спортсмен-влак чот ноят, сандене нунылан, лÿмын ыштыме тоям (рушлаже «удочка» маныт) пуш гыч шуен, бутылка дене кочкышым пуат.

Таҥасымаш тÿҥалме деч ончыч ияш ямдылалтме площадкыште мо ышталтме нергенат каласыме шуэш. Мутлан, тиде кечымак налына. 12 шагатлан «старт» гын, спортсмен-влак 10 шагатланак объектыш толыт. Нуно вÿдыш пурен ончат, регистрацийым эртат да ийме жапым эскерыше шагатым кидыш пижыктат. Латиктат пелылан заплывысе площадкым «калык деч эрыктат». Тушко посна карточке дене гына пураш лиеш. 10-15 минут эртымеке, спортсмен-влакым номерышт почеш черет дене заплывысе площадкыш луктыт. Тыгак «старт» деч ончыч комментатор калыкым ик минутлан шып лияш йодеш. А вара, пычал йÿкым колын, спортсмен-влак вÿдыш тöрштат. Теве тыге таҥасымаш тÿҥалеш.

Тунам мый трибунышто шинчыше калык дене пашам ыштышым. Нунылан тÿрлö «кричалкым» туныктышым да оператор дене возкален кошташ логале. Теве англичанла мутланаш йöн шуко гана лекте.

Волонтер-влак каненат моштат. Универсиаде ялыште кажне кастене могай-гынат культур программе лиеда. Мутлан, чемпионат тÿҥалме деч ончыч «Регион-влакын представленийышт» лÿман мероприятий эртыш. Тиде 23 июльышто лие. Тушто Марий Эл делегацият шке мастарлыкшым ончыктыш.

Ме «Марий Эл гыч улына, Чыландам саламлена» речёвкынам ойлышна, Семён Вишневскийын "Мой край родной" почеламутшым йоҥгалтарышна да Марий Эл нерген изишак палдарышна. Тыгак «Марий ÿдыр» мурым мый мурышым, а молышт куштышт. Варажым марий-руш-татар куштымаш дене мучашлышна.

Тыгак «Караоке вечеринке» да «Гитаре дене шоктымо кас» мероприятий-влакым палемдаш лиеш. Волонтёр-влак коклаште шуко талантан музыкант да мурызо уло. Эше яра жапыште волейбол, футбол але баскетбол дене модына. Тыгай годым иктаж спортсмен дене палыме лияш - кугу пиал. Вет нунат мече дене модаш йöратат, эре спорт площадкыш коштыт. Тыге 19 ияш Сидрелл Уильямс дене палыме лийна. Тудо Ямайка гыч да 50-100 метран дистанцийыште «вольный стиль» дене таҥаса. Тыгак Сидрелл футбол да баскетбол дене модаш йöрата. Тудын мутшо почеш, нуно переменыштат сок атым чумен модыт. Российыш спортсмен икымше гана толын, игече келша манеш, эрдене гына тудлан йÿштын чучеш. Икмыняр руш мутым пала, а тыгеже тудын дене англичанла мутланышна...

Палаш: 2 августын лектышыж почеш, Вÿд дене тÿнямбал 16-шо чемпионатыште икымше верыште Китай кая, тудын 11 шöртньö медальже, 9 ший да 3 той уло. Кокымшо верыште - Россий 8 шöртньö, 4 ший да ик той медаль дене. Кумшо - Америке 4 шöртньö, 3 ший да 2 той медаль дене.