Сергей Данилов: «КРАВЕЦ» гай форумышто лияш тыршыман

Самырыктукымын тÿвыра да историй туныктымо «КРАВЕЦ» форумыштыжо шуко оҥай вашлиймаш лийын. Теве Марий кугыжаныш драме театрын артистше-влак, Марина Почтенова ден Сергей Данилов, толын коштыныт, мастар-класс-влакым эртареныт, калык семÿзгар дене палымым ыштеныт, шокташат туныктеныт. Тыгак муро дене куандареныт да «Кыткы сÿäн» спектакль гыч ужашым модын ончыктеныт. А ме, этножурналист-влак, Марий Элын сулло артистше Сергей Данилов дене мутнам вашталтышна.

- Салам лийже, Сергей Ксенофонтович, шке нерген изиш каласкалыза.
- Салам! Шочынам да кушкынам Морко район Кораксола ялыште, шинчымашым Шÿргыял кыдалаш школышто налынам. 1994 ийыште, классвÿдышын темлымашыж деч вара, Моско оласе М.С. Щепкин лÿмеш кÿшыл театр училищыш (институтыш) тунемаш пураш шонен пыштышым. Тунам мый, йолташем (Эдуард Яковлев) дене кутырен, пырля кудална. 1998 ийыште, тунем пытарымеке, Шкетан лÿмеш театырыш пашаш пурышым да кызытат тушто улам.

- Сцене дене кыл кунам да кузе шочын?
- Тиде школ жапыштак лийын. Драмкружокыш кошташ тÿҥалынам. Тыге спектакль дене пошкудо ялыш (Токсар, Ярансола, Йоплан да мололо вереат) лекме. Чаманен каласаш логалеш, шуко ялысе клубшо кызыт петырналтын. А, школым пытарымек, артист лиям манын, шоненат омыл.

- Могай рольда утларак лишыл, чонеш кодын?
- Мыйын шонымаште, артистын кажне рольжо шÿмеш кодеш. Нимат огеш керт мондалт. Роль неле лиеш гынат, кыртмен репетицийыш коштман, да сайын выступатлыман.

- «Кравец» форум нерген мом каласен кертыда?
- Чынжым ойлаш гын, эн ончыч мыйын пелашем, Марина Почтеновам, ÿжыныт ыле, да тудыжо мыйымат пырля нале. Тиде форум моткоч сылне, оҥай. Самырыктукымжат пеш поро улыт. Шонем, умбакыжат тиде форумым вияҥдаш кÿлеш.

- Мом форумын участникже-влаклан тыланеда?
- У еҥ дене палыме лияш, нуно дене кылым кучаш. Ужам, шуко кундем гыч толыныт, садланак икте-весе коклаштат кылым йомдарыман огыл. Интерактивный лияш кÿлеш. Да тыгай форумыш эреак коштман!

Алевтина Бокова, самырык этножурналист, мутланен.

М. Шкетан лÿмеш Марий кугыжаныш драме театрын сайтше гыч:

Сергей Данилов – шкешотан актёр, тудын репертуаржат ынде поян: тушко руш, йот элласе классик, тыгак марий драматург-влакын произведенийлашт почеш шындыме спектакльлаште тÿрлö роль пурен. Дамис (Мольер, «Тартюф», 1998), Сану (М.Шкетан, «Ачийжат-авийжат», 1998), Виталий (В.Филиппов, «Шоҥго ÿдырын мурыжо», 1998), Мичуш (Н.Арбан, «Кеҥеж йÿд», 2001), Метрий (Ш.Башбеков, «Кум кечылан у кува», 2003) – теве икмыняр рольжо.

Эреак уым кычалаш тыршымыже, тÿрлö образым тÿрлö семын чоҥымо кумылжо тудын пытыдыме, актёр шкенжым сценыште эрыкын куча – тидыжак геройын илышыж дене илаш полша. Тыгак чоҥалтыныт роль-влак «Эреҥер» (А.Пудин, 1998), «Салика» (С.Николаев, 2004), «Кронуш» (А.Петров, 2005), «Кожла кокласе омо» (В.Шекспир, 2006) спектакльлаште. Поснак ойыртемалтшын, мастарын ыштен тудо Тимошкан (А.Волков, «Каче-влак», 2005), Григорийын (Ф.Буляков, «Эрта ÿмырем, кодеш кумылем...», 2008), Йыванын (М.Шкетан, «Ачийжат-авийжат», 2008), Шайдуллинын (Ю.Соловьёв, «Йыван кырла», 2009) рольыштым. Актёр Сергей Данилов комический, тыгак драматический рольымат моштен чоҥа. Кажныштыже тудо ондаксым ок ушештаре, шкешотан улмыжым ончыкта, геройын образышкыже, манмыла, пÿтынек пурен кая.

Актёр концертлаштат усталыкшым да мастарлыкшым кумылын ончыкта. Шÿвырым шоктен моштымыжлан кöрак театрын концерт программыже утларак поян лийын. Сергей Данилов 2004 ийыште Словакийыште эртыше шÿвырзö-влак фестивальыштат участвоватлен. Весат тудын мастарлыкшым пеҥгыдемда: шÿвырым ыштыме йöным тÿрыс рашемден, тиде семÿзгарым ынде шкеак ямдыла.

Спортыштат тале улмыжо коеш – ик гана веле огыл профсоюз рескомын Почётан грамотыж дене палемдалтын.

Театр искусствым вияҥдымашке изи огыл надырым пыштымылан Сергей Ксенофонтович Данилов 2004 ийыште Марий Эл Республикын культура, печать да национальность-влак паша шотышто министерствыжын Почётан грамотыж дене палемдалтын. Марий национальный культурым арален кодымаште да вияҥден колтымаште тыршымылан тудлан 2008 ийыште Марий Эл Республикын Кугыжаныш Погынжын Почётан грамотыжым кучыктымо.