Уфашке – Саммитыш

Вход на сайт

Башкортостанын рÿдолаже 2015 ий 8-9 июльышто тÿнямбал кÿкшытан погын-влакын рÿдерышт лие. БРИКС да ШОС-ын саммитышкышт пеш шуко йот эл гыч кугу чотан делегаций-влак толын коштыч. Паша лектышышт тÿвыргö лийже манын, республике кок ий чоло лым лийде тыршыш. Мероприятий-влакым эртарымашке кундемыште илыше-влак ушнышт. Уфа уэм кодо.

Таче мый тендам, лудшо-влак, Нефтекамск оласе пассажир автотранспорт предприятийын машинам виктарышыж дене палыме лияш темлем.

Дöртыльö район Ивачъялеш шочын-кушшо Артём Асянов Башавтотрансыште 12-шо ий тырша. Ончыч такси автомобильже дене кошто, вара ола кöргысö автобус дене калыкым кондыштарыш. Ынде кудымшо ий ола-влак кокласе рейсышке коштеш, пассажир-влакым Ижевскыш, Уфашке, Бирскыш, Татышлыш, Балтачыш, Бурайыш шупшыкта. Паша стажшат ситышын, калык денат мутланен мошта, вуйлатышыже да коллегыже-влак коклаштат пагалат.

ArtemAsjanov_Arslan.jpg

Кодшо ий шыжым предпирятийым вуйлатыше-влак машинам виктарыше-влакым посна списокыш чумырышт да кажныштым картычкыш велыктышт, но молан тиде - ышт умылтаре. Моланже шошым веле пале лие. Тунам Артёмын коштмо Мерседес-спринт микроавтобусшым Мелеузыш ремонтыш наҥгайышт. Тушеч автобусым чылт уэмдымым пöртылтышт - чиялтыме, пассажирский гыч салон кöргым грузовойыш савырыме. А Уфашке командировкыш ватыже да кум эргыже ачаштым 13 июньыштак ужатышт. Эрлашыжым аэропортышто тудо элнан рÿдолаж гыч толшо специалист-влакым вашлие. Артем Яниповичлан Федеральный службо охранын инженерышт-влак дене пашам ышташ перныш.

«Пассажирем-влакын тыршымыштым ужын, каласен кертам: саммитлан ямдылкалымаш кÿжгö лие. Погын-влакын эртышаш полатлашке, тÿҥжым Конгресс-холл йыр, инженерный коммуникаций-влакым пыштен, нуно южгунам 10 шагат кас мартет объектлаште кучалтыч. Но шкеныштым порын кучышт», - каласкала Артём Асянов.

Чолга пöръеҥ ешара: «Нефтекамск гыч машинам виктарыше 22 еҥ мийышна. Транспорт коклаште кугу автобус-влакат лийыч - Сканий, Мерседес-Бенц, ВДЛ. Чыла транспорт рÿдолан 4-ше №-ан ПАТП-жын гаражыштыже шогыш. Мыланна полшаш Екатеринбург гыч 70 еҥ шке микроавтобусшыт дене толыч. Нефтекамск гыч мийыше водитель-влак кокла гыч икте Москва гыч толшо «Кремлевский балет» театрын труппыжым шупшыктыш, шукышт - йот элласе делегацийым. Йот элласе президент-влак кокла гыч шке кочкышышт да поварышт денат толшо лийын, коллеге-влаклан нунымат шупшыкташ логале. Мутлан, вес марий рвезе, Дöртыльö районысо Ангасяк ял гыч Александр Мухаметов, Бразилий гыч толшо делегацийын багажшылан мутым кучыш. Эн чот тургыжланышт, мыйын шонымаште, президентский кортежыште коштшо-влак»

«Тыгай команидровко кажне еҥланат илыш умылымашым пойдараш, эл кокласе кÿкшытан тÿрлö мероприятийын кÿлешлыкыштым умылаш полша», - палемда Артем Янипович.

Автор: Елена Газина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.