Ямле кеҥеж кече шинчам гына огыл куандарен, чонымат дару (эм) деч посна эмлен. Вет ты кечын Пошкырт кундем Мишкан район Тымбай ял кугу лÿмгечыжым пайремлен, тÿрлö-тÿрлö верыште, лишыл да тора кундемлаште, илыше шочшыжо-влакым иквереш чумырен. Тыге, шочмо-кушмо мландыште вучымо вашлиймаш эртыш. Ты кечынак ялыште ик эн кугулан шотлалтше Ямакай тукымын пайремже лие.

Историйыште икымше гана эртаралтше родо-тукым пайремыш изижге-кугужге 60 утла родо-шочшо погыныш. Тиде – Россий мучко шаланен пытыше Ямакайын уныкаже, кугезе ден кугезе-кугезе уныкаже-влак.

Вашлийме кечын кажныжын чурийже куан тул дене волгалтын, икте-весе дене вашлийме тат кумылым вÿчкен да шинчавÿдым луктын. Родо-шочшо-влак тÿрлö кундем гыч толыныт: Пошкырт кундем (Тымбай, Бирск, Мишкан, Нефтекамск, Уфа), Челябинск область, Йошкар-Ола, Тюмень область, Ханты-Манси автономный округ. Кö паша гыч йодын толын, кö лумын отпускым налын, кажныже, кужу корным ончыде, тукымна иланыме верыш вашкен.

Пайремыште Ямакайын 65 ияш Валентина ÿдыржö лийын, ачаж нерген шарнымашым ойлен, шочмо яллан, кызытсе ден ончыкылык тукымлан поро сугыньым каласен.

Мемнан тукым ялын ожнысо олмыштыжо, тудым ончыкылык тукымлан арален кодаш манын, парклан негызым пыштен. Тымбай ялын паркшым ял пайрем кечын Мишкан районын да ялысе администрацийын вуйлатышыже-влак официально почыч.

Парк ныл ужаш гыч шога: «Ямакай тукымын садше», «Йоча – еш эҥертыш», «Еш – илыш негыз» да «Пушеҥгым шындымаш – пÿртÿсым сöрастарымаш». Иктыжым, Ямакай тукымын садшым, кочайын кок уныкажлан – Михаил ден Валерий Ямакаевлан - почаш ÿшанышна. Лач нуным Ямакай кочай илымыж годым ужын шуктен.

Тиде кечын Тымбай ялыште эше ик йÿлалан тÿҥалтышым пыштыме. Ешлан пöлеклалтше ужашыште кугу пушеҥге шога. Самырык мужыр – Ямакайын кугезе уныкаже Елена (Нефтекамск гыч) ден пелашыже Родион (Бирск гыч) – пушеҥгыш йошкар тасмам кылдышт. Тиде – шкешотан еш символ. А самырык-влаклан тыге ттемлыме: тасмам кунар кÿшкырак кылдет, тунар пиаланрак лият. Кугезе мландыште еш илышлан негызым пыштен, 2015 ий 3 июльышто нуно чапле сÿаным эртарышт.

Вÿд воктене паркым почмеке, пайремыш погынышо калык ялысе клуб могырыш вашкыш. Тушто ялысе администраций верланен. А ожно лач тиде верыште пеҥгыдын йолÿмбалне шогышо «Первомайский» колхозын правленийже лийын. Кужу жап тудым ялыште пагалыме айдеме, ялозанлык пашаеҥ, Йошкар Знамя орденын кавалерже Павел Шамратов вуйлатен. Тудлан пайрем кечын клуб пырдыжеш шарнымаш оҥам почыч.

Тылеч вара калыкым школ стадионышто кугу концерт программе да мастар-влакын ярмингашт вучен. Лач тушто, куэрла коклаште, кечыгут марий сем йоҥген, сценыште ялысе, тыгак район гыч толшо коллектив-влак, Марий Эл гыч мийыште «Шайра кундем» ансамбль выступатленыт, пошкудо ялла гычат мурызо-влак миеныт. Нунын деч вара Ямакай тукым шке концерт программыжым ончыктыш. Тудын тÿҥ шонымашыже тыгай ыле: шочмо ялна лийын, ила да ончыкыжымат тÿзланаш тÿҥалеш.

Мотор Тымбай ялем кужу илыш корным эртен, тÿрлö пагытыште илен, шке суапле пашаж дене историеш келге кышам коден да кода. Кеч-могай ялын эн тÿҥ поянлыкше – тиде калык. Шочмо ялыштем моткоч пашаче калык ила – мÿкш гай пашам ышта, ушан-шотан икшыве-влакым кушта, лÿмлö еҥже-влак дене кугешна, марий сÿанымат модеш, кертме семын кугезе йÿламат шукта да пайрем годым каненат мошта. Теве ял пайремым эртарымаштат мыняр тыршеныт – урем ден кудывече-влакым тÿзатеныт, озадыме оралте-влакымат öрдыжеш коден огытыл. Организатор-влакын (ялсовет администраций вуйлатыше Арсений Андреев, школ директор Геннадий Ибатов, школ директорын алмаштышыже Надежда Минаева, клуб пашаеҥ-влак Зоя Баязова ден Зинаида Новикова, ялысе староста Иван Микаев, библиотека пашаеҥ Снежана Ибашева, мер пашаеҥ-влак Валерий Ямакаев, депутат Владимир Шамратов) тыршен да моштен вуйлатымышт дене, уло ял калыкым тарватен кертыныт.

Ял калык деч оксам погеныт, шийвундо дене эше ялысе «Алан» кевыт (Дмитрий Ибраев) ден верысе администраций полшеныт. Организатор пашам виктараш куштылго огыл гынат, паша лектышыжым ужат да сеҥен лекме чыла неле-йöсыжат мондалтеш, шонем. Кеч-мо гынат, йöратыме Тымбай ялемын пайремже да мемнан тукым вашлиймашна пеш куанлын да веселан эртышт. Мыйын шонымаште, ты кече кужу жаплан шарнымашеш кодеш да у вашлиймаш марте чоннам ырыкташ тÿҥалеш. Вет ты кечын шочмо-кушмо ялем мÿкш омартала гÿжлыш, шке шочшыжо-влаклан куанен, шокшо чевер кечым чаманыде пöлеклыш, ямле тымбай сем дене вашлийын, эн сай тыланымашым ойлыш да, шке шочшыжо-влаклан поро деч поро сугыньым пуэн, вес гана ужмешке чеверласыш.

Автор: Алевтина Кузнецова, Тымбай ÿдыр.