«iВолга -2015» шуко жаплан ушыштына

Вход на сайт

Ivolga-2015.jpg2015 ийыште Юл федерал кундемысе «iВолга» молодёжь форумышто Самырык этножурналист школын ныл чолга еҥже лийын. Анна Васильева, Вероника Мустаева, Ирина Павлова икымше гана шке проектыштым араленыт, а Надежда Тимофеева ынде кокымшо ий почела «Арслан» этнокультур интернет-журналын спецкорреспондентше семын тыршен. Нуно форум нерген теве мом ойлат.

Анна Васильева:

- iВолга форум пеш оҥайын эртыш. Мыланем тушто моткоч келшыш. Шуко уым пален нальым, уш-акылем пойдарашым, тӱрлö пашалан тунем тольым: мутлан проектым возаш, чын цельым да задачым шындаш. Тыгак философий сынан тренинг-влак лийыч. Туштат мый шукылан тунемым. Теве, илышыште чын корным ойырен налаш, эн тÿҥжым ойыраш. Раш умылышым: паша эре куаным кондышаш. Ушыштем ик тыгай шонымаш кодо: «Паша хобби гай лийшаш, да куаным кондышаш». Чынжымак, тыге пашатым йöратет гын, чылажат сай лектышан лиеш.

Моткоч келшыш ораторский искусство дене тренинг, йӱкым шындаш, чын да раш ойлаш тунемынам. Тыгак шуко палыме да оҥай еҥ дене вашлиймаш лийын. Нуно шке сеҥымашышт нерген каласкаленыт, кӱлешан ой-каҥашым пуэныт. Журналист семынат шуаралтме.

Форымышто канышланат жап лийын. Концерт, КВН, выставке, спектакль ончыкталтыныт. Тыгак спорт площадке, куштымаш, караоке да шуко молат пашам ыштен.

Тушеч мый куан кумыл дене пöртылнам да у пашалан пижаш ямде улам.

Вероника Мустаева:

- Мылам тиде форум чотак келшыш. Чылажат оҥай, кӱлешан. Шуко ушан еҥ дене вашлиймаш эртыш: Катарина Романцова, Михаил Самсонов, Владимир Максимов, Родион Скрябин да т.м. Кажныже шкешотан, могай-гынат у шинчымашым мыланна пуыш. Шке пашашт денат палдарен кодышт.

Тушто ятыр йолташым муым, тӱрлö регион гыч. Мутлан, Киров кундем гыч, Удмурт Республике гыч, Чебоксар ола гыч да молат. Кушто эше мый нунын дене палыме лиям ыле?
Форумыш толшо кажне еҥын шинчаже йӱла. Кажныже шке пашаж дене шӱла, сеҥышыш лекнеже. Мыят тыгаяк кумыл дене илышым!

Яра жапна шагал гынат, Юл эҥерыш йӱштылаш миен коштна. Тӱрлö сменын мероприятийжым ончышна.

Надежда Тимофеева:

- Мый кокымшо гана iВолгашке журналист семынак миенам да форум мыланем кок пачаш чотрак келшен. Форумышто пеш оҥай ыле, эксперт-шамыч дене вашлиймаш лийын, мый сай шинчымашым погенам, ятыр у айдеме дене вашлийынам.

iVolga_Arslan.jpg

Ушештарена, 17-27 июньышто Самара областьын Фестиваль паркыштыже (Мастрюковский ер) Юл федерал кундемысе «iВолга - 2015» эртен. Тушко Марий Эл Республике гыч 100 наре еҥ миен, 85-ше - шке проект дене. Кум еҥ сеҥышыш лектын, федерал окса кÿшеш проектыштым илышыш шыҥдараш тÿҥалыт. Тиде - Константин Арон (МарГУ), Екатерина Большакова (ПГТУ), Индира Тихонова.

А чылажге форумышто кандаш смене пашам ыштен: «Патриот»; «Политике»; «МедиаВолна»; «Культур бум»; «Поролык тукым»; «Тый - амалкалче»; «Инноваций ден технический усталык», «Шочмо вер-шöр – пашам виктараш йöн» да «Спорт молодёжь – таза калык» фитнес-смене.

«iВолга-2015» форумын призовой фондшо 9 млн теҥге лийын.

zatwLjsA5nI.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.