Гран-прим (ала коктымат) кок ий эртымеке сеҥен налыт? (видео)

Вход на сайт

Марий Эл Республикын Марий Турек районжо гыч Иван Герасимов «Китня ялыште Ӱярня пайрем» пашаж дене Россий кÿкшытан видеофильм фестивальыште кок («Эн сай звукорежиссёр паша» да «Эн сай оператор паша») номинацийыште сеҥен да эше «Признание коллег» спецноминацийыште палемдалтын. Тыге, 2015 ий 10-12 июньышто Марий кундемыште калык усталык, йÿлашке пурышо тÿвыра да этнографий шотышто Россий кÿкшытан видеофильм фестиваль шымше гана эртен.

FestivalVideo1_Arslan.jpg

Видеофильм пайремыш 28 паша икмыняр регион гыч пурен: тиде - Пошкырт, Коми, Марий Эл, Мордовий, Одо, Байкал вес могыр, Пермь, Иркутск да Саратов кундемла гыч.

Нуным ушан да пеҥгыдын йодшо жюри аклен. Ты радамыште - Моско гыч Россий калык усталык пöртын видео усталык пöлкажым вуйлатыше Наталья Голева, «Марий Эл» ГТРК-ан ветеранже Валентин Кудрявцев, «Марфильмофонд» кугыжаныш тÿвыра тöнежым вуйлатыше Анатолий Харыбин, В.М. Васильев лÿмеш МарНИЯЛИ-н этнологий секторжым вуйлатыше Никандр Попов да Калык усталык да культурканыш паша шотышто республикысе шанче-методик рÿдерын ик пöлкажым вуйлатыше Игорь Бычков.

FestivalVideo3_Arslan.jpg

Чыла пашам ончен лекмеке, иктешлымаш годым ятыр ой-каҥашым пуэныт. Тыгодым шылталымашат лийын. Вет южо видеофильмже мöҥгыштö еш коклаште гына ончаш келшат да конкурслан пырчат шотлан огыт тол. Теве профессионал телевидений дечат жюри еҥ-влак шукырак вученыт, мутлан, «Марий Эл» ГТРК деч. Туге гынат «Эн сай оператор паша» номинацийыште тиде телевидений гыч Сергей Камышкиным палемденыт.

А Иркутск областьысе Черемхово телевиденийын пашаҥже Елена Горбунова «Таких людей не победить» фильм дене кок - «Эн сай документальный фильм» да «Эн сай режиссёр паша» - номинацийыште лауреат лийыныт. Тудын пашаже, чынже денак, шонаш тарата. Шинчавÿд деч посна ончаш ок лий, вет Кугу Ачамланде сарын геройжо-влак нерген ойлалтеш.

«Эн сай модыш фильм» номинацийыште Звенигово район гыч «Бабушкина соль» паша сеҥен.

FestivalVideo2_Arslan.jpg

Ты гана гран-прим нигöат сеҥен налын огыл. Кузе палемденыт организатор-шамыч, кок ий гыч ала кок гран-при лийын кертеш. Вет лач кок ий гыч угыч тыгай фестиваль вуча.

Видеофильм фестивальын организаторжо-влак: Марий Эл Республикысе тÿвыра, печать да калык-влакын пашашт шотышто министерстве, Калык усталык да культурканыш паша шотышто республикысе шанче-методик рÿдер.

Фестивальым иктешлымаш годым шке сылне йÿкышт дене мурызо-влак Роза Искакова ден Светлана Яндукова куандареныт. Тыгак Курыкмарий районышто эртыше «Пеледыш айо» шуко жаплан шарнымашеш кодын.

Автор: Эльвира Куклина.

Иван Герасимов. «Китня ялыште Ӱярня пайрем».

Иван Герасимовын ик пашаже.
Оксана Ермакова (Оксина) мура.

FestivalVideo6_Arslan.jpg

FestivalVideo4_Arslan.jpg

FestivalVideo_Arslan.jpg

FestivalVideo5_Arslan.jpg

«Китня ялыште Ӱярня пайрем» фильм гыч.

image_5.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.