Марий кугыжаныш университетыште Калыкле тÿвыра да калык кокласе кыл институтын РМ-22 группо кöргыштыжö марий йылме ден литератур арня эртыш.

Икымше кечын арням торжественно почна. Мемнан группыштак тунемше ÿдыр-влак почеламутым йоҥгалтарышт. Христина Иванова, Надежда Сергеева да Юлия Тихонова «Оласе да ялысе кова-влак» оҥай сценкым модын ончыктышт. Нуно шке модышышт гоч палемдышт: «Олаште илымеке, ялыш толыт да марла пуйто мондат». Чынак, тыгайже чÿчкыдын вашлиялтеш.

Кокымшо кечын шкешотан олимпиаде лие. Команде-влаклан шелалтна. Кажне командылан - посна йодыш. Йодыш-влак шонаш таратышт.

Олимпиаде икмыняр тур почеш эртыш. Пытартыш турыш эн виянже, эн патырже лекте. Палемден кодыман, кызыт марте марий мурым палымаш конкурс дене ваштÿкнымö огыл. Моткоч чот öрыктарыш. Но тиде заданийымат команде-влак куштылгын шуктышт.

Кумшо кечын мурызо, поэтесса, радиовÿдышö да сай айдеме Татьяна Светлакова (Соловьёва) дене вашлийна. Тиде вашлиймашын ик эн тÿҥ шонымашыже - самырык возгалыше-влакым пален налаш, возаш кумылаҥдаш.

Татьяна ондак шкеж нерген студент-влак йодмо почеш палдарыш: кушто да кунам шочын, кушто тунемын, кузе поэзий деке шÿмыҥын, кузе сценыш лектын.

Кызыт ойлат, возгалыше-влак шагал улыт. Мый тидын дене ом келше, возышо-шамыч улыт. Теве РМ-22 группыштак шагал огыл возгалыше-влак улыт, лачак тидын нерген огыт палдаре. «Шып возгалыше-влаклан» Татьяна Светлакова икмыняр ой-каҥашым пуыш. «Возен шогаш кÿлеш, тунемаш кÿлеш, вожылаш огыл», - палемдыш поэтессе. Самырык-влакым сентябрь тылзе гыч «Поэзий шепкаште» сылнымут клубыш ушнаш ÿжö.

Ты вашлиймаш годым студент-шамыч Татьянан возымо почеламутшым сылнын йоҥгалтарышт. Да мучашлан поэтессе деч ик мурым мураш йодыч.

Вес кечын почеламут конкурс лие. РМ-22 группысо кажне гаяк тунемше шке почеламутшым йоҥгалтарыш. «Шып возгалыше-влакынат» шонымашыштым, почеламутыштым колыштна. Сöрал!

А пытартыш кечын, кугарнян, арням иктешлышна, сеҥыше-влакым палемдышна да Марий йылме ден литератур арням торжественно мучашлышна.

Кугу тау Светлана Александровна Малининалан, марий йылме туныктышыланна, тыгай шонымашым мыланна пуымыжлан, да РМ-22 группылан тыгай весела да кÿлешан арням эртараш полшымыжлан.

Автор: Вероника Мустаева, Самырык этножурналист школын еҥже.