Муралташ шонен толын улына,
Кушталташ шонен толын улына.
Тиде «Корак сöрмарийжым»
Пайремлаш лӱмын толынна.

Тыге мурен корак сӱан годым, калык ял мучко пöрт еда коштын.

Корак сöрмарийым Олор кундемыште Рошто пайрем деч кок кече вара эртареныт. Корак сӱан марий сӱан семынак эртен. Оръеҥ ден качымарий, сӱан-вате-влак лийыныт. Тӱмыр олмеш калай ведрам перкаленыт, ӱдырамаш-влак пöръеҥла, пöръеҥ-влак ӱдырамашла чиеныт, нерышкышт корак гай нерым ыштен пижыктеныт.

Сӱан калыкым суртышто кинде-шинчал дене вашлийыныт, мелна, туара, мӱй пура, пареҥге-шоган когыльо, чырык арака дене сийленыт. Суртозалан корак сӱан калык шке вургемжымак шып налын пöлеклен коден да сугыньым пуэн: чыве мунан, шорык кок пачаян, ушкал йыгыр презан лийышт манын пелештен. Тыге сӱан калык эр марте пайремлен коштын. Эсогыл тувыр урвалтышыштат калай гай лийын пыта ыле.

Корак, ялышке толмекыже,
Пыжаш опташ тӱҥалеш.
У пöртышкет пурашыже
Сай пелашым кычалеш.

А теве Олор воктене верланыше Тошкемнур ялыште Корак сöрмарийым Октябрь пайрем деч вара эртареныт. Молан кок лишыл ялыште тыгай ойыртем – таче нигö каласен огеш керт. Кузе да кунам тиде пайрем лекмымат илалше-влакат умылтарен огыт мошто. Иктышт ойлат, самырык-влак илыш оҥайрак лийже манын, пайремым шонен луктыныт. Весышт пайремын игече дене кылдалтше шотшо уло маныт. Кудыжо чын, каласаш йöсö. Но кызыт тиде пайремым ялыште огыт эртаре. Спектакль сын дене гына калык ончыко луктыт. Тачысе кечылан мемнан марте икмыняр тошто муро аралалт кодын (муреныт 1960 ийлаште):

Тиде пушеҥгым безовсякий руэна,
Потому что тудо мемнан делянкына.
Тиде суртыш безовсякий пурена,
Потому что мемнан родо тыште ила.

Кÿзанÿштыдам огыда ÿштал гын,
Поген пÿтырен пыштыза.
Сырен, туманлен огына ойырло,
Вашлиймыда годым пелештыза.

Автор: Дина Коновалова,
«Арслан» этнокультур интернет-журналын практиканткыже.