«Мый марла ойлем» акций Оршангыште эртыш (фото, видео)

«Вик корно дене ошкылза… Тушто кызыт марий сем йоҥга». Тыгай вашмут лие Оршанге урем дене ошкылмем годым «педколледжда кушто?» йодмемлан.

Да, кумыл эшеат кӱшкö нöлталте. Самырыктукым ямдылалтеш. Теве афишат кеча: «2015 ий 21 майыште И.К. Глушков лӱмеш Оршанге педагогический колледж «Мый марла ойлем» акцийыш пагален ӱжеш!».

Ваштарашем тиде акцийым шке шочмо тунемме верыштыже эртараш шонен пыштыше рвезе Максим Алгайкин тольо – унам порын вашлие. Чолга марий самырыкъеҥ мероприятий-влакым эртарен тунемын. Кажне арнян я шкеже иктаж-мом студент-влаклан ышта, я кундемыште ворандаралтше сомылыш кумылын ушна (Самырык этножурналист школыштат шуаралтеш!) да колледжын моло студентшымат тарата. Тыгай паша кумыллан педколледжым вуйлатыше Светлана Яковлевна Яровикова куана, чыла йöным кертме семын ышташ тырша.

А Максим Оршанге педколледжыште кум ий тунемме жапыште мероприятийлан тунемын гынат, чонжо ты ганат вургыжо. Вет Марий Эл мучко да марий калык илыме регионлаште шарлыше «Мый марла ойлем» акцийым тыште икымше гана ыштышт. Туге гынат «мелна» чевер да тамле лие.

Студент-влак марий тувырым чиен, марий сем почеш куштен, марий мурым мурен, почеламутым ойлен, марий модыш дене модын, верысе калыкамат сымыстарышт. Нунылан «Рушла-марла мутланымаш» буклетым, «Ямде лий» газетым пуэдышт. А чылаштымат кинде-шинчал дене вашлийыч.

Тыге колледжын шӱдыржö-влак Алина Митрофанова ден Марина Пекпулатова муро дене куандарышт. Алёна Ошуева Давлет Исламовын «Йӱр деч вара» почеламутшым шергылтарыш. Валентина Баженова Семён Вишневскийын «Мой край марийский» почеламут дене шочмо вер-шöр нерген эше ик гана шарналташ таратыш.

Акцийын программыжым Елена Шестакова ден Максим Алгайкин мастарын вӱдышт.

Самырыктукымым директорын алмаштышыже-влак Светлана Васильевна Летова ден Эльвира Ивановна Кошпаева да мый, «Арслан» этнокультур интернет-журналын редакторжо Эльвира Куклина, саламлышна.

Тӱшкагудын воспитательже Тамара Алексеевна Москвичёва, руш гынат, ик марий куштымашымат ыш кодо, кап-кылжым марий сем почеш лывыртыш. А йыр куштымаш акций мучко ятыр гана лие.

Ӱдыр-рвезе-влак «шергаш шылтенат», «вӱд йогенат» модыч. Викториныште уш-акылыштым тергышт. Эн чолга-шамычлан (тыште верысе калыкат лийыч) пöлек-влакым кучыктышт: «Ямде лий» газетым, книгам. Теве «Арслан» журнал деч «Мый марла ойлем» значокым да уш-акылым шуараш полшышо моло пöлекым пуышым. Тыгак «Тыште марла кутыраш лиеш» наклейкым организатор-влаклан кучыктышым, тӱрлö тöнежыште сакалаш.

Чолга еҥ-влаклан кöра «Мый марла ойлем» акций умбакыже вияҥеш, шарла. Кугу тау тудым шонен лукшо, эртараш тӱҥалше да калыкыш ужатыше-влаклан! Тек акцийын ӱмыржö кужу-кужу лиеш, марий калыкна, тудын йылмыже, тӱвыраже да йӱлаж семынак!

Автор: Эльвира Куклина.