Марий талешке кече дене Оньыжа саламла

Вход на сайт

MarijOnuza1_Arslan.jpgПагалыме марий калык!

Марий Мер Каҥаш лÿм дене уло кумылын чыландамат Марий талешке кече дене саламлем!

Кажне калыкын да саманын шке талешкыже уло. Иза-шольо венгр калык Иштван корольым чапландара, эстон калык – Лембиту нерген мура, финн калык Финн Мак Кумал да Вэйнэмейнен дене кугешна, мордва калык инязор Пургазым, удмурт Кузебай Гердым шарнен ила, а марий-влак ожнысекак шке чоныштышт Чумбылатым, Полтышым, Мамич-Бердейым, Акпатырым, Акпарсым перегат. Эртыше кок курымын талешкыже-влак радамыш тыгак С.Г.Чавайным, Я.П.Майоров-Шкетаным, И.С.Ключников-Палантайым, Э.Н.Сапаевым, Я.А.Эшпай ден А.Я.Эшпайым, Т.Е.Евсеевым, И.П.Петровым, В.М.Васильевым, И.Г.Ивановым, И.С.Галкиным, тыгак Кугу Отечественный сарыште вуйыштым пыштыше Совет Союз Герой-влакым ÿшанлын пурташ лиеш.

Кодшо курымын 90-ше ийлаже тÿҥалтыш годсек кажне ийын марий мерсото да пÿтынь калык 26 апрельыым ик эн жаплыме пайрем семын палемда. Кызыт Марий талешке кечым
Марий Элыште веле огыл, пÿтынь марий тÿняште кумдан палемдат. Тугеже кызытсе глобализаций саманыштат кажне марий чонышто акрет сугынь ила да вияҥын толеш.

Пагалыме марий-влак! Таче мый чыландамат алал кумылын тиде кугу марий пайрем дене саламлем. Ончыкыжымат шке калыкнам пагалаш, шочмо йылмынам аклаш, марий тÿвыранам йöраташ, кугезе йÿланам жаплаш ÿжам.

Чылаланда пеҥгыде тазалыкым, кужу ÿмырым, вашла пагалымашым да пиалым тыланем.

Пайрем дене!

Пагален Марий Оньыжа Анатолий Николаевич Иванов.

Икымше лаштыкыш пöртылаш>>>

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.