Елена Куприянова: Самырык еҥ чолгалыкшым вияҥдаш тунемшаш

Самырык годым чыла вере шуаш тыршена, тӱрлӧ аланыште вийнам тергена, шинчымашнам ончыктена, кугыеҥ-влакын каҥашыштым шотыш налын, шкаланна чын корным ойырынена. Чын, чыла шонымашкына иканаште шуын огына керт. Туге гынат самырык-влакын лидер койышышт лийшаш. Молодёжь правительстве Самырыктукым парламент гаяк лидер-влакым кушташ полша.

Марий Эл Республикыште тыгай правительстве 2013 ий майыште шочын. Тушто таче 17 молодёжь министр уло. Кажныжын - шке пашаже. ПГТУ-н студенткыже, министр Елена Куприянова Марий кундемыште калык-влак кокласе кылым вияҥдыме шотышто министерствылан вуйын шога.

«Каласыман: министр-влак пашам шкет огыт ыште, нунын алмаштышышт улыт. Мыланем пашам ворандараш кок алмаштыше полша. Молодёжь правительстве экспертно-аналитике, проект да кадр направлений-влак дене сомылжым шукта.

Тыге кадр резервым формироватлыме да туныктымо, тыгак Марий Эл Республик вуйлатышын да Правительствын кӱштымышт почеш, экспертно-аналитический, информационный материал-влакым ямдылыме, тӱрлӧ проектым возымо шотышто паша ышталтеш.

Тыгай правительстве ӱдыр-рвезе-влакын права шотышто умылымашыштым келгемдаш, республикын мер-политике илышыштыже чолгалыкыштым ончыкташ йӧным ышта, - ойла Елена Куприянова.

Ӱдыр ешара: «Калык-влак кокласе кылым вияҥдыме шотышто министерствына тӱрлӧ оҥай да кӱлешан темылан мероприятийым, йыргешке ӱстелым эртара. Мутлан, «Молодёжь в политкультурной России: вызовы времени», «Современный экстремизм и методы противодействия» теме-влак дене йыргешке ӱстел, «КРАВЕЦ» культур-историй форум пайдале лийын манын, шонем. Ме тӱрлӧ калыкле-мер организаций дене кылым кучена. Ӱмаште 13 ноябрьыште Марий Эл Республикыште илыше калык-влакын молодёжь ассамблейыштым ыштыме. Тӱрлӧ калыкын 17 мер объединенийжын представительже-влак ассамблейыш пурымо шотышто пунчалыш кидпалыштым пыштеныт. А шукерте огыл министерствына пелен эл-влак кокласе кылым вияҥдыме шотышто у паша группым чумырымо. Тушко чылаже 12 йодмаш пурен. Эксперт комиссийын пунчалже почеш, кандаш еҥым налме, паша группын вуйлатышыжлан Вероника Ивановам шогалтыме.

Самырык тукым правительствын председательже – Василиса Евгеньевна Баскакова. Моткоч чулым. Самырык-влак дене кугу пашам шуктен шога. Поро кумылым ончыктымо мероприятийлаш ушнаш кумылаҥда.

Правительствын активистше-влак республикылан пайдам кондаш тыршат. Районлаш лектын коштына, конференцийым эртарена. Кумылан-влак самырыктукым правительствын членже лийнешт гын, эн ончыч йодмашым колтышаш улыт. Вара вашмутланымаш лиеш. Эн чолга ӱдыр-рвезе-влак паша группышто тыршаш тӱҥалыт, ме нунын пашаштым аклена. А вара министерствылаш колтена. Вконтакте соцсетьыште «Молодежное Правительство Республики Марий Эл» группо уло. Тушто шуко уверым муаш лиеш».

Мер пашалан школышто кумылаҥын

Самырык мер пашаеҥ Елена Куприянова Курыкмарий район Эман селаште шочын-кушкын. Школышто сайын тунемын, музыкым йӧратен. «Эман кыдалаш школ 1999 ийыште почылтын. Лачак тунам у школыш икымше классыш каенам. Музык школышто кӱсле классыште тунемынам. 9-ше классыште мер пашалан кумылаҥынам. Школысо тӱрлӧ мероприятийыш эреак ушнаш тыршенам. Кугурак классыште тунемше-влакын ушемыштын членже лийынам, районысо «Молодая гвардия» самырыктукым организацийым вуйлатенам, - мут мундыражым умбакыже шуя ӱдыр.

Унана палемда: «Школышто историй ден обществознаний предмет-влакым йӧратенам. Садлан ик жап историйым туныктышо лияш шоненам, но ПГТУ-со Управлений да право факультетыш тунемаш пуренам. Кызыт визымше курсышто улам, моткоч келша. Университет образованийым пуымо деч посна студент-влакын чолгалыкыштым вияҥдаш тӱрлӧ йӧным ышта. Икымше курсышто историйым йӧратыше-влакын клубышкышт коштынам, икмыняр жап гыч тудын председательжылан шогалтеныт. А вара Молодежь правительствыште тыршаш тӱҥалынам. Тыгак Молодежь инициативный группын членже улам. Шке жапыштыже «Пеледыш» мурышо да куштышо ансамбльыш коштынам. Но жап укелан кӧра тушеч каенам.

Молодёжь правительствыш вучыдымын логалынам манаш лиеш. Курыкмарий район администраций пелен самырыктукым паша шотышто пӧлка гыч йыҥгыртеныт да Самырыктукым правительствыш документем пуаш кӱштеныт. Тунам ты правительствын пашажым рашыже пален омыл, туге гынат район йодеш гын, шуктыман, шонышым. Икмыняр жап гыч вашмутланымашыш ӱжыныт, а мый тунам Ростов-на-Дону олаште лийынам. Кокымшо отборыш веле логалынам. Мыйым калык-влак кокласе кылым вияҥдыме шотышто министрлан шогалтышт. Шке пашам моткоч йӧратем. Ончыкылыкем мер пашаште веле ужам, тиде чонемлан лишыл. Правительствын активистше-влак ик еш гай улына, районыш лектедена. Шукерте огыл коллеге-влак дене пырля йоча пӧртыш миен коштна».

Елена Куприянова - чолга студентке, молодёжь министр, ятыр грамотшо уло, но тудо эн кугу аклан еҥын таумутшым шотла. «Кунам ыштыме пашан сай лектышыжым ужат, калыкын таумутшым колат, чонлан ласкан чучеш. Тугеже арам огыл тыршена! Тидыже грамот дечат шыргырак», - манеш ончылъеҥ.

Анастасия Эманова мутланен.
Материал "Кугарня" газетыште лектын.