Тунеммаштат, мер пашаштат чолга (фото, видео)

25 июльышто поро йолташна, Максим Алгайкин, шочмо кечыжым палемдыш. Тудым "Арслан" этнокультур интернет-журналын келшен илыше коллетивше шокшын саламла да пиалым, тазалыкым, илыш куатым тылана. Пагалыме Максим, тек корнет волгыдо да кужу лиеш, шонымашет-влак шукталт толыт. Тыгаяк поро, еҥым умылышо, чолга, пашаче, ушан лийын код. Вет чынже денак тые, шке йырет самырыктукымым чумырен, нуным ончыко вÿден моштышто рвезе улат.

Максим Алгайкин "Арслан" этнокультур интернет-журналым вияҥдаш полша - журнал пеленсе Самырык этножурналист школын еҥже. А шукерте огыл тудым "Самырык этножурналист" регион-влак кокласе самырыктукым мер ушнымашым вуйлаташ сайлыме.

...Студент жапыште икте эре тунемеш, йӱдшӧ-кечыже книгам лудеш, конспектым ышта, а весе, йолташын полшымыжлан ӱшанен, сессий гыч сессий марте ласкан ила. Теве Оршанкысе И.Глушков лӱмеш педколледжын кумшо курсыштыжо шинчымашым нӧлтышӧ Максим Алгайкин тунеммаште веле огыл, мер пашаштат чолгалыкше дене ойыртемалтеш. Тудо — Самырык-влакын парламентыштын членже.

Морко районысо Красный Стекловар посёлкышто шочын-кушшо Максим Алгайкин - лаштыкнан тачысе унаже.

- Самырык-влакын парламентышкышт кузе логалынат?

- Парламентыш кок ушем дене лектынна: иктыже — «Единая Россия» партий , а весыже студент-влакын ушемышт гыч. Мыйым кокымшыж гыч ойыреныт. Студент-влакын ушемышт дене колледжыште тӱрлӧ пашам ыштена. Тений Сеҥымашлан 70 ий темме лӱмеш шуко мероприятийым эртараш палемдена. Мутлан, «Студент шошо» фестивальыш уло кумылын студент-влак ушнат. Марий возыктыш кечылан пӧлеклалтше пайремат оҥайын эртен. Тыгак шукерте огыл Шочмо йылмын кечыжым пайремлышна. Тушто марий йылме нерген телепередачым ончымо, йылмым палыме шотышто викторине шонкалаш таратен. Тыгай вашлиймаш-влакым шукырак эртараш шонена. Вет нуно марий улмына деч вожылмым кораҥдаш, шочмо йылмынам вияҥдаш полша.

- Шке блогым почаш мо таратен?

- Кодшо ийын «Интеллектуал» тӱвыра-увер рӱдер да «Арслан» этнокультур интернет-журнал вӱдышӧ Эльвира Куклинан чумырымо «Самырык блогерын школышкыжо» коштынам. Тушто шке блогым почмо, тудым пойдарыме шотышто ятыр кӱлешан уверым пален налме. Тиддеч вара мыят ты пашалан шӱмаҥынам. Блогышто педколледжын илышыжым ужаш лиеш. Выпускник-влакын шарнымашыштым пуртенам, лийын шогышо мероприятий нерген возем, увер дене палдарем.

- Тылат марла яндарын мутланен колташ нелырак ала-мо. Туге гынат тӱрлӧ мероприятийыш ушнет.

- Мый руш, татар калык-влак коклаште кушкынам. Но марий йылме моткоч келша. Кертмем семын тӱрлӧ марий мероприятийыш уло кумылын ушнем. Марий калыклан марий улмыж деч вожылаш ок кӱл. Шке шагал мутланем гынат, тунемам, кугурак-влак деч опытым погем.

Колледжыш тунемаш пурымеке, республикысе школышто тунемше-шамычлан да студент-влаклан шанче-практике конференцийым эртарымаште тыршем. Районысо веле огыл, республик кӱкшытысӧ конкурслаште уш-акыл поянлыкым тергем, колледжын чапшым нӧлтем.

Кодшо ийын Марий самырык тукым слётышто лийынам. Келшен. Марий ӱдыр-рвезе-влакым иквереш чумырышо вашлиймашын лектышыжат пеш кугу. Тушто марла мутланыме, марий йӱла дене лишкырак палыме лийме, команде дене пашам ышташ тунемме да молат. Самырык правительстве, сайлымаш теме кушкын толшо тукымлан оҥай лийын. Вет самырык тукым политикыште лийшаш.

IMG_4094+.jpg

- Кызытсе студент яра жапым кузе эртара?

- Яра жапем «СТС» театр студийыште эрта. Тушко икымше курс гычак кошташ тӱҥалынам. «А зори здесь тихие» спектакльыште тӱҥ геройын рольжым модам. Студийыш коштмо мылам «почылташ», сценыште чын мутланаш тунемаш, мастарлыкым шуараш полша. Ончыкыжым театр студийым вуйлатыше Эльнара Викторовна Богатырева дене колледжыште газетым лукташ шонена. Тудыжым марлат, рушлат ямдылаш кутырен келшенна.

Алевтина Байкова мутланен.
Налме вер: http://gazetamariel.ru.

Максим Алгайкинын блогшо: http://colledge.livejournal.com.
Вконтактыште группым ыштен: http://vk.com/maks_algaikin.