Пагалыме ӱдырамаш-влак!

Марий Мер Каҥаш да Марий Эл Кугыжаныш Погын лÿм дене чыландамат ÿдырамаш-влакын тÿнямбал кечышт дене алал кумылын саламлем!

Ӱдырамаш – тиде шÿм-чон яндарлыкын, порылыкын, тÿткылыкын да весе верч азапланен моштымашын сынже. Лач ÿдырамаш кажныжлан ош тÿням, куаным да порылыкым пöлекла.

Йоча пагыт гыч тÿҥалын, ÿмыр мучко ÿдырамашын – аван да пелашын - поро кумылжо, ныжылгылыкше да йöратымашыже пÿтынь тÿнялан илыш вийым пуэн шогат. Тидым ме эре шарнена да тауштен илена.

Пагалыме ÿдырамаш-влак! Тичмаш еш пиал ден шокшо сурт возакым арален кодышаш верч лым лийде тыршымыланда, тыгодымак ялысе я оласе пашаште Марий кундемнам вияҥдымашке кугу надырым пыштен шогымыланда шÿм гыч лекше кугу таум ыштем да мланде марте вуем савем. Лач тендан тыршымыда дене шочмо йылмына, тÿвыра поянлыкна да акрет саман гыч куснен толшо кугезе йÿлана марий тÿняштына аралалтыт да вияҥын толыт. Лач тендан шокшо шÿм-чонланда кӧра марий калыкна ила. Тау тыланда, пагалыме ÿдырамаш-влак!

Пÿртÿс помыжалтме дене пырля толшо икымше шошо пайрем кечын чылаланда пеҥгыде тазалыкым, кужу ÿмырым да тичмаш еш пиалым тыланем. Тек родо-тукымда, лишыл еҥда да икшывыда-влак таза, улан да полыш кидым шуялташ ямде шÿм-чонан лийыт, а тачысе 8 Март кече тек волгыдо йöратымашым да пайрем кумылым конда.

Пагален, Марий Оньыжа, Марий Эл Кугыжаныш
Погын вуйлатышын алмаштышыже Анатолий Иванов.