Пётр Емельянов: ТЫГЕ ТӰҤАЛМЕ

Вход на сайт

Тений (2013 ий - ред.) И.К.Глушков лӱмеш педколледж пел курымаш лӱмгечыжым палемдаш тӱҥалеш. Тудым РСФСР Министр-влак Советын 1963 ий 3 апрельыште лукмо Пунчалже почеш почмо.

Тӱҥалтыш ныл ий жапыште пеш шуко нелылык пернен, вет у училищын ни шке тунемме верже (вашке гына кызытсе полиций верланыме кок пачашан зданийым пуымо), шотан тӱшкагудыжат, икманаш, ниможат уке манмаште, «Беларусь» тракторжо да ик имньыже лийын. Теве мыланемат тыгай тунемме заведенийыш пашам ышташ толаш логалын.

Икымше тунемме ийлан чылаже 150 еҥым налме: кум марий группыш – 90, кок руш группыш – 60 еҥым. 1963 ий 25 сентябрьысе 17-ше номеран приказ почеш 19 преподаватель гыч шогышо икымше педсовет погынен: училищын директоржо А.Я.Айбердин, тунемме паша шотышто директорын полышкалышыже К.Г.Бессергенева, парторганизаций секретарь М.К.Бессергенев, ВЛКСМ комитет секретарь А.П.Булякова, профком председатель Е.А.Хлебников, педпрактика вуйлатыше Т.А.Айбердина, библиотека вуйлатыше А.А.Хлебникова, йылмызе-влак комиссий вуйлатыше В.Н.Белянина, моло преподаватель И.В.Семенов, С.З.Зайнашев Н.В.Домрачева, О.И.Крылова, Е.Н.Смирнов, К.К.Аганина, В.Г.Опалев, Т.В.Аганина, А.В.Ковалев да тиде возымашын авторжо, а мастерскойым И.П.Соков вуйлатен. Нинын кокла гыч тачысе кечылан илышыже кокытын веле улына.

Теве тыгай икымше тунемме ий. Кажне ийын педколлективыш у туныктышо-влак ешаралтыныт гынат, эн первый нелылык нине преподаватель-влаклан логалын. Тунемше-шамычат кажне ийын ешаралтыныт. 1967 ийлан 15 школьный, 3 дошкольный да 2 физкультурный группа-влак лийыныт.

Тунам мемнан ончыкылык коллегына-влак кушто гына илен огытыл, эсогыл рвезе-влак инкубатор станцийын ик пӧлемыштыже илен толашеныт. Шоналташат моткоч шучко! Конешне, ме, класс вуйлатыше-влак, тидым пален налмеке, корным директор деке виктарышна да экшыкым тачак тӧрлаш йодна. Училище оза ойнам шуктыш: рвезе-влаклан пачерым кычалаш тӱҥална. Экшык тӧрланыш.

Кызыт педколледжын илышыже, поснак материальный базыже, йӧршеш вашталтын: кум пачашан тунемме тӱҥ корпус, кок пачашан музыкальный корпус, кок вич пачашан тӱшкагудо, поян библиотеке, кок спортивный зал, столовый, чапле стадион, йоҥгыдо тунемме кабинет-влак да молат. Икманаш, тунемаш да пашам ышташ чыла йӧн уло.

Автор: Пётр ЕМЕЛЬЯНОВ, СССР калык туныктышо.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.