Москошто илыше марий диджей Аксар Марий Элыш толын коштын (фото, видео)

2015 ий тӱҥалтыште Йошкар-Олашке Моско гыч марий диджей Аксар (DJ AKSAR) толын кошто. Тудо Этнопатиште лие, вара "Плёс" кафеште эртыше марий дискотекым сӧрастарыш. Паша кокла гыч DJ Аксар дене мутым вашталтышна. Ме тудын дене икмыняр йодышлан вашмутым кычална. Марий диджей-влак таче улыт мо? Нуно мыланна кӱлыт мо? Кызытсе пагытыште марий дискотекын кӱкшытшӧ нерген ойлен кертына мо?..

Аксар Эльтемеров Марий Эл Советский район Кодам ялыште шочын-кушкын. Жапше годым Н.К. Крупская лӱмеш педагогический институтын физический культур факультетшым тунем пытарен. Армий деч вара (кандаш ий ондак) Москошко каен, Россий МЧС пожар ваштареш кучедалше кугыжаныш службышко пашаш пурен. Ынде физически ямдылалтмаш да спорт кафедре пелен кугурак преподавательлан тырша да капитан мартеат кушкын. Палемдыман, Аксарын Ольга пелашыжат - МЧС пашаеҥ, кызыт изи эргышт дене шинча.

Шочмо кундем деч торашке кайымеке, чон усталык паша деке шупшын. Тыгеже Аксар школышто тунеммыж годымак почеламутым возаш тӱҥалын, музык деке шӱмаҥын. Национальный президент школ-интернатыште (Йошкар-Ола) сӱретчылан тунеммыж годымак шке семынже пианино дене шокташ тӧчен. Варарак куштымо сем келшаш тӱҥалын. Ача-аважын тамлым налаш пуымо оксаштлан аудиодискым наледен, клуб семым шымлен. 8 класс гычак дискотеке-влакым эртараш тӱҥалын.

Кодам школышто гитаре дене шке семынжак шокташ тунемын, куштымо семын, мурын ойыртемыштым утларак эскерен, шымлен.

Тиде пагытыштак рвезе спорт дене пеҥгыде кылым кучен.

Пединститутшто тунеммыж годымат сылнысемым йӧратен, "Марий сем" ансамбльыш коштын, почеламутым, мурым возен.

А Москошто яра жапыште семым чоҥымо посна программе-влакым шке гыч тунемаш пижын, музыкальный композиций-влакым ыштен ончен. 2010 ийыште DJ Грувын аудио школышкыжо возалтын. Тушто тудо DJ Грув, Виктор Строганов, Android, M.Pravda, DJ Flash, Вячеслав Шаинский, Ян Миренский да моло кумдан палыме диджей, музыкант дене тунемын. Тушто тӱнямбалне чапланыше еҥ-влак денат вашлияш йӧн эреак уло, сандене Аксар аудио школыш жап лийме семын миен коштеш, илыш дене тӧр ошкылаш манын, у увер-влакым пален шога.

Кызыт DJ AKSAR-ын Интернетыште шке страницыже (DJ AKSAR - Mari Radio Mix 4) уло. Ятыр мурым возен. Club House, Dancecore, Progressive House, Progressive Trance, Psy Trance стиль дене трек-влакым ыштен. Тудо Москошто икмыняр гана марий дискотекым наҥгаен, ресторанлаште выступатлен. Марий Элыште тений икымше гана марий дискотекын унаже лийын.