А уремыште У ий!? Марий календарь почеш, 2015 ий – Ӱшкыж идалык

Марий календарь почеш, 2015 ий – Ӱшкыж идалык. Тудо мемнан деке 22 мартыште толеш, Агытан идалыкым вашталта.

V2 - Jivotnye0171!_1.jpg

Ӱшкыж идалык - 1919, 1951, 1983, 2015 ийла.

Ӱшкыж – чытымаш, радамын шонкален моштымаш, порылык, кӱштымым шуктымаш, тӧрлыкым кучымаш.

Идалык тыныс, ласка лийшаш, пӱртӱсын шулыкшо дене леведалтшаш. Тиде ийын шочшо-влакым эре эскерыман, кӱтӱчӧ семын кӱтенак шогыман. Идалыкым ласка шомакым кучылтын поктыман. Тӱнямбалне ӱшкыж ий калык коклаште ваш-ваш шогымаш, тыныс дене шӧралтын. Кӧ ӧргымӧ койышым амал деч посна ончыкта гын, юмо тудым кужу жаплан тергымашышке пурта. Иктаж-могай амал дене калык ончылан уто-сите осалым ончыктымылан, идалык, виян тӱкыж дене ушкалым, презе-влакым веле огыл, калыкымат индыраш огеш пу – тукымна верч мучаш марте шога.

Шотан да радаман оза, Ӱшкыж вийым кучылтын, пасу пашаштат, мер илышыштат сай лектышым налеш. Кинде, шудо да мланде ӱмбалне шочшо моло кушкыл, вольык чока да сай таман лиеш. Идалык кугу виян, лектышан лийшаш, ӱшкыж шке виян тӱкыж дене илышын кучемжым нӧлтен шогаш тӱҥалеш. Туге гынат калыклан палаш кӱлеш: нӧлталалтше илышнам пӱсе тӱкӧ гыч сӱмыраш пуаш огеш кӱл. Тиде ийын ӱскыртланаш нигунарат шотеш огеш тол. Виян вольыкын йол йымалныжат почаҥын лекташ амалым пуыман огыл.

Ӱшкыж ийготышто икымше империалист сарым Версальский договор почеш шогалтен кертме (1919 ий).

Ӱшкыж ийготышто шочшо-влак кугу капан да виян лийыт. Уш-акылышт дене ласка, пашам йӧратыше, мучаш марте шуктышо улыт.

Пагален, Марий Эл Республикысе рӱдӧ юмыйӱла.

U ij!.jpg