Татарстанысе марий калык-тӱвыра автономий пелен самырык пӧлка тырша (фото)

Вход на сайт

Татарстанысе марий калык-тӱвыра автономий пелен самырык пӧлкам вуйлатыше Софья Шарабуеван ойжо.

Поро кече, пагалыме уна-влак! Ик ий ончыч мый самырык пӧлкам вуйлаташ тӱҥалынам. Тиде жапыште пеш кугу паша ышталтын.

Озаҥ оласе марий калык-тӱвыра автономийлан 20 утла ий. 2011 ийыште автономийын самырык пӧлкаже погынен, тудын икымше вуйлатышыже Надежда Макарова лийын.

ceOaoIrOjJs.jpg

Самырык пӧлкан тӱҥ шонымашыже – шочмо калыкнан культурыжым, самырыкъеҥ коклаште марий шижмашым аралаш. Мемнан тӱшкаште тӱрлӧ марий еҥ улыт: курыкмарий, олыкмарий, эрвелмарий. Ме Татарстанысе калык-влакын келшымаш пӧрт пелен пашам ыштена - тудын мероприятийлашкыже ушнена, марий йӱлам, мурым, куштымашым, марий вургемым ончыктена. Поснак палемдыме шуеш марий кинофильмым ончымо нерген. Тиде - Денис Осокинын «Шошо», Алёна Иванован "Кугу корка" кинофильмышт.

coUmUpNxRP4_0.jpg

2011 ийыште «Лай мардеж» ансамбль шочын. Ансамбльын участникше-влак шукынжо Татарстан кундемын тӱрлӧ районжо да тыгак Марий Эл гыч толшо улыт.

2013 ийыште ансамбльынат вуйлатышыже вашталтын. Надежда Макарован пашажым ынде мый шуктен шогем.

ERg0WUL0-Sg.jpg

Эртыше ийыште ик эн шарналтше тат – тиде марий койышнам кумда тӱняш, Эстонийыш, луктын ончыктымаш. «Финн-угор родо-тукым» фестиваль14-21 октябрьыште лийын. Фестиваль гыч пӧртылмеке, 4 ноябрьыште Тинчурин лӱмеш театрыште «Наш дом - Татарстан» фестивальын гала-концертыштыже койышнам ончыктенна.

Ансамбльна вес калыкын пайремышкыжат ушна: «Караван» руш фестиваль, татар-влакын «Науруз» пайремышт. ТНВ-ын «Жырлыйк эле», «Башваткыч» телепередачылаштыже уна лийме. «Лай мардежын» мурымыжо «Играй, гармонь» да XXVII тӱнямбал универсиада годым йоҥгалтын.

hAa6z_W1lyY.jpg

Чынже дене, самырык-влак коклаште кугу паша эртаралтеш. Эн ончычак - марий дискотеке. Тыгай касыш Озаҥ ола гыч веле огыл, а Татарстанын тӱрлӧ верже да Марий Эл гычат толедат. Шуко калыкым погаш социальный сетьыште тӱрлӧ увертарымаш полша. А вес гана ӱжаш ме лӱмын анкетым шонен луктынна, кушто кажныже шке телефонжым, шке ойжым коден кертеш. Поснак кугу полышым Наташа Кукушкина пуа. Тудлан моткоч кугу таум каласена.

Тений 7-8 февральыште Марий Элын Торъял районыштыжо концерт-влакым эртаренна.

kVhBeeyo6uU.jpg

Марий калык-тӱвыра автономийын пашашкыже ушнена. Тыге йӱла дене кылдалтше пайрем-влакым: Шорыкйолым, Ӱярням, Марий талешке кечым пырля эртарена. Тыгак кажне ийын «Семык» пайремыште Озаҥ ола гыч делегацийым вуйлатена.

Мемнан пашана лач мурымо да куштымо веле огыл. Теве 29 августышто «Юл кундемысе калык-шамычын кочкышышт» регион-влак кокласе фестиваль-конкурсышто вийнам тергенна да «Йӱлам аралымаш» номинацийыште палемдалтынна. 30 августышто Озаҥ да Татарстан кечым пайремлыме годым Шатровый паркышке ушненна.

nllyBTTCjp8.jpg

Марий Эл денат кылым кучаш тыршена. Теве Марий кундем гыч самырыктукымын "Марий Мурсем" ансамбльже Келшымаш пӧртын сценыштыже шке мастарлыкшым ончыктен. А шукерте огыл, 19 октябрьыште, "Тукым гыч тукымыш" теме дене вашлиймаш эртен. "Марий Эл" ГТРК-н журналисткыже Алёна Иванова "Кугу корка" кинофильмже дене толын. Поснак каласыме шуэш Озаҥыште илыше марий ветеран дене вашлиймаш нерген.

Тыгак мемнан ӱдыр-рвезе-влак Марий самырыктукым слётыштат чӱчкыдын участвоватла.

rMsdoBbfDbw.jpg

Кызытат ансамбльышкына чолга еҥ-влак коштыт. Мутлан, Александр Славин, Галина Алжикова, Юлия Гаврилова да Анна Таныгина. Марий йылмым, тӱвырам, тошто илышым палымаш мемнам ик ояным, вияным да ваш-ваш келшышым ышта. Татарстанын, Марий Элын тӱрлӧ районжо гыч толшо да Озаҥ олаште илыше самырыкъеҥ-влакым уло кумылын мемнан пӧлкашке ушнаш ӱжына.

Ӱшаныме шуеш, ончыкшымат самырык ава-ача-шамыч йочаштым марий улмышт дене кугешнаш таратен куштат.

Пагален, Софья Шарабуева.

SOWoNkiMOKk.jpg

yxgg6jddqGI_0.jpg

Zx4teNunfM4_0.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.