«Йыргешке пӱкен»: «Кугу корка» фестивальым эртараш (фото)

14 ноябрьыште Марий Эл Республикысе Т.Евсеев лӱмеш калыкле тоштер пелен чумыргышо самырык-влакын клубышт черетан «Йыргешке пӱкен» вашлиймашым эртарыш. Ты гана тудо Калыкле кидпаша сымыктыш тоштерыште лие. Тушто кундемыште кидпашам вияҥдыме, ты сомыллан изинекак шӱмаҥдыме да Марий кундемын брендше нерген мутланышт.

«Шокшо пӱкеныште шинчышт»: Марий Элысе «Пу вий» мер организацийым вуйлатыше Виталий Кудрявцев, тӱрлызӧ, Республикысе калыкле президент сымыктыш школышто йоча-влакым кидпашалан туныктышо Алёна Ямбарцева, журналист, «Ончыко» журналыште тыршыше Борис Шамиев. Нунылан ӱдыр-рвезе-влак ятыр йодышым пуэдышт. Мучаште тыгай иктешлымашке шуыч: илен-толын, кугу корка дене кылдалтше фестивальым эртараш, школлаште кидпаша дене кылдалтше занятий, кружок-влакым утларак вияҥден колташ.

Вашлиймашын унаже-влак: Марий Элысе тӱвыра, печать да калык-влакын пашашт шотышто министерствыште пӧлкам вуйлатыше Игорь Садовин, Т.Евсеев лӱмеш тоштерым вуйлатыше Лидия Смирнова.

Чылаштымат озавате - Калыкле кидпаша сымыктыш тоштерым вуйлатыше Ирина Губанова - поро кумыл дене вашлийын.

Тиде кечынак Калыкле кидпаша сымыктыш тоштерыште "Кид дене ыштыме модыш" республикысе фестиваль почылтын.

А «Йыргешке пӱкен» тылзылан кок гана эрта. Тиддеч ончыч ӱдыр-рвезе-влак республикысе тӱвыра, печать да калык-влакын пашашт шотышто министр Михаил Васютин дене вашлийыныт ыле.

Автор: Эльвира Куклина.