У книга: Валерий Григорьевын пьесе-влак книгаже лектын
Вход на сайт
Марий Элын сулло артистше, драматург Валерий Григорьевын икымше книгаже ош тӱням ужын. «Эҥыремышвот» книгашке авторын икмыняр пьесыже пурен.
Валерий Григорьев ятыр пьесым серен да театрын сценышкыже луктын. У савыктышышке вич произведений пурен: «Ава шӱм», «Ош йӱксӧ», «Эҥыремышвот», «Ял покшелне, клуб воктене», «Шоктесола пазар».
Пьесе-влак илышын тӱрлӧ шӧрынжым ончыктат, ошыжат, шемыжат лыҥак, герой-влакын койыш-шоктышышт шонкалаш таратат. Книга тӱрлӧ ийготан лудшо-влаклан темлалтеш.
Валерий Помбеевич Григорьев 15 ий Республикысе марий тӱвыра рӱдерым вуйлата. Шкеже Марий Элысе Провой кундемыште шочын-кушкын. Жапше годым Кульпросветучилищым (кызыт – И.С.Палантай лӱмеш тӱвыра да сымыктыш колледж) тунем пытарен. Салтак корно деч вара Республикысе курчак театрыште, М.Шкетан лӱмеш Марий кугыжаныш драме театрыште артистлан пашам ыштен. Москошто А.В.Луначарский лӱмеш ГИТИС-ыште актер мастарлыкым шуарен. Шкетан лӱмеш театрыш пӧртылын, вара Республикысе марий самырык театрыште артистлан, режиссерлан тыршен. 1996 ийыште «Марий Элын сулло артистше» лӱм дене суапландаралтын.
Пытартыш жапыште Валерий Григорьев драматург семын койынак ойыртемалтеш. Йоча-влаклан пöлеклалтше пьесе конкурсышто «Йӱксӧ ӱдыр» произведений дене кумшо верым налын. «Марий драматургий» республик кӱкшытан конкурсышто кок гана «Ава шӱм» да «Эҥыремышвот» пьесе-влак дене кокымшо верыш лектын.
Ятыр пьесыже «Ончыко» журналыште савыкталтын, «Юзо гармонь» (2013) тӱшка сборникыште лектын.
Автор: Эльвира Куклина.
- Эльвира Куклина
- пн, 11/03/2014 - 23:53
- Войдите, чтобы оставлять комментарии
