«Майатул» пайрем семын эрта

Вход на сайт

a_b6ca1fd1.jpg21 октябрьыште М.Шкетан лÿмеш Марий кугыжаныш драме театрыште «Майатул» финно-угор театр-влакын тÿнямбал Х фестивальышт почылтын. 27 октябрь йотке 12 театр шке мастарлыкшым ончыкта – калык да жюри ончыко ик эн сай спектакльжым лукташ тырша. Нуно Российын тÿрлö кундемже да йот элла гыч толыныт.

«Майатул» фестивальын тÿҥ шонымашыже – финно-угор театр-влак кокласе кылым эшеат пеҥгыдемдаш да, икте-весым ончен, тÿрлö калыкын театр тÿвыражым вияҥдаш.
Фестивальым почмо годым Марий Эл Республикыск тÿвыра, печать да калык-влакын пашашт шотышто министр Михаил Васютин поро мутым ойлен да чылаштлан усталык сеҥымашым тыланен.

Пайрем тÿҥалтышыште ончаш толшо-влаклан моткоч оҥай видео-архивым ончыктеныт. Кажныже тудым шулен ончен, а вара сценыш, 12 тÿрлö калыкын вургемжым чиен, артист-влак лектыныт да тÿрлö йылме дене саламлыме мутым ойленыт.

Театр пайремым марий спектакль дене фестивальым вашлийше-влак почыныт. М.Шкетан лÿмеш марий кугыжаныш драме театр «Монча кечын» комедийым калыклан пöлеклен. Спектакльыште тÿҥ рольым Павел Ефимов мастарын модын.

Фестивальлан ямдылыме спектакль-влакым кугу опытан жюри член-влак аклат. Нуно Финляндий, Эстоний элла, Москва да Казань олала гыч улыт, вуйлатышышт – Марий Эл Республикысе тÿвыра, печать да калык-влакын пашашт шотышто министрын икымше алмаштышыже Владимир Актанаев.

«Майатул» фестиваль шым кече шуйна, ончышо-влакым кажне гана у спектакль дене куандара. 27 октябрьыште жюри пашам иктешла, эн сай паша да усталык коллектив-влакын лÿмыштым каласа. Но кузе фестивальым эртарыше-влак палемдат, тений верым нигöланат огыт ойыро, вет X «Майатул» пайрем семын эрта.

Театрым йöратыше, родо-тукым кылым жаплыше кажне еҥым спектакль ончаш ÿжына. Тек «Майатул» фестиваль калыкым иктеш уша, театр тÿвырам пойдара да кумылнам нöлта. Спектакль-влак М.Шкетан лÿмеш да Марий самырык театрын сценыштышт эртат.

Автор: Ирина Павлова,
«Арслан» этнокультур интернет-журналын спецкоржо, МарГУ.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.