Альбертина Иванова: "Мый ом кычал тораште пиалем…"

О Шочмо ял. Йöратыме верем!
Ӱжат авайла мыйым шке декет.
Вашлийме кече - мыланем пайрем,
Чон муро гае лайык тый денет.

Тыге ойла ик почеламутыштыжо кумдан палыме марий поэтессе Альбертина Петровна Иванова (Аптуллина). Тудлан тений 60 ий теме. Тиде пайремжылан пöлеклалтше касым шочмо кундемыштыже - Кужэҥер район Тошто Йÿледÿр ялыште - пöлеклышт. Сылнымут да сылнысем кас 17 октябрьыште ты ялысе тÿвыра пöртыште эртыш.

SAM_1816+.jpg

Альбертина Иванован почеламутшылан возымо муро-влакым Марий Элын сулло артисткыже Татьяна Денисова йоҥгалтарыш. Чолга марий еҥ-влак Мария Мутукова ден Римма Катаева поэтессе дене кылдалтше ушеш кодшо тат-влакым шарналтышт.

Тунамак Кужэҥер кундемысе школлаште шинчымашым погышо тунемше-влак коклаште почеламутым сайын лудмаш шотышто конкурс лие. Игече начар улмылан кöра ныл тунемше гына толын кертын. Тыге поэтессе Альбертина Иванова икымше вер дене Шÿдымарий школысо 9-ше класс гыч Валерий Линьковым палемдныш. А Кужэҥер поселкысо 2-шо №-ан школ гыч Наташа Родионовам "Иледа-кутыреда" (Альбертина Иванова) почеламутым кок гана лудыктышт, вет ÿдыр моткоч мастарын тидым ышта.

Тыгак касым верысе "Ший оҥгыр" ансамбль, мурызо Полина Савальева сöрастарышт.

Альбертина Ивановат чумыргышо калыкым у почеламутшо-влак дене куандарыш.

Автор: Эльвира Куклина.