26 апрельыште, Марий талешке кечын, Пермь оласе Марий мер рӱдер 10 ий темме кечыжым пайремлен. Лач тынар ий ончыч тудым официально регистрироватлыме. Тиде кечынак «Пермь кундемысе марий-влак» («Марийцы Пермского края») книган презентацийже эртен. Ты книга Пермь кундемлан веле огыл, тыгак пӱтынь марий калыкланат пеш кӱлешан.

Пытартыш жапыште Марий кундем, тысе калык, нунын тӱвырашт да йӱлашт нерген утларак шукырак палаш шонышо-влак Россий да тӱнямбал кӱкшытыштат ятырын лектыт. Теве кызыт Моско гыч Марий Элыш толшо уна-влак марий калык нерген 52 минуташ документальный фильмым войзат. Тиде пашам «Мир» лӱман кугыжаныш-влак кокласе телерадиокомпаний ворандара.