4 сентябрьыште Чарла Кремльыште (Йошкар-Ола) Республикысе марий тӱвыра рӱдер черетан «Марий касым» сылнын эртарыш. Ты гана «Такмак он» конкурс дене куандарыш.

Конкурсыш 12 еҥ ушныш. Медведево, Советский, Шернур районла, Йошкар-Ола, Киров кундем Уржум вел, Ханты-Мансийск автоном округ гыч лийыч. Теве Шернур вел гыч Аркадий Макматов тӱмыр дене толын ыле да мастарлыкше калык чоным тарватыш.

Йошкар-Ола гыч Майя Малинина ден Алевтина Актубаева пеш кертыч. Кажныже ойыртемалтше муро дене куандарыш. Алевтина Йошкар-Ола нерген у такмак-влакым шергылтарыш гын, Майя илыш нерген каласкалыше ялт палыдыме тошто такмак-влакым калыклан пӧлеклыш.

Йошкар-Ола гычак Таисия Петрова коваж деч колмо такмак-влакым шарналтыш. Уржум гыч Валентина Аникеева тошто сем почеш мурыш.

Ну а, сеҥышыш Ханты-Мансийск автоном округ гыч Людмила Романова лектын. Тудлан гармоньчо Сергей Янсубаев полшен.

Сеҥыше-влаклан пароварке пӧлек шотеш логалын. Тыгак кажне участниклан муро дискым амалкалче Сергей Карпов деч кучыктымо.

А касым Медведево районысо «Эр ӱжара» фольклор ансамбль сӧрастарен. Ансамбльым вуйлатыше, мурызо Снежана Орлова шкежат мастарлыкшым ончыктен.

Чарла Кремльысе «Марий кас» вес кеҥеж марте чеверласыш. А октябрь тылзе гыч «Марий касын» у тургымжо почылтеш. Кушто эрташ тӱҥалмыж нерген варарак шижтарена.

Автор: Эльвира Куклина.