7 августышто Чарла Кремльыште (Йошкар-ола) черетан «Марий кас» моткоч сылнын эртыш. Тышке изижат, кугыжат, самырыкшат, илалшыракшат погыненыт да, марий сем почеш куштен, касым веселан эртареныт.

Ты гана программе Йошкар-Олан 430 ияш шочмо кечыжлан пöлеклалтын. Касым Марий Элын калык артисткыже Зоя Берникова сöрастарен. Тудым калык моткоч шокшын вашлийын, эсогыл мучашлан мурызым ынешатат колто ыле.

Тыгак Киров вел Уржум кундем гыч марий вате-шамыч уна лийыныт. А Шернур вел гыч Аркадий Макматов толын да тÿмыр дене шоктен.

Кас мучко калык да эстраде муро ÿчаш-ÿчаш йоҥгеныт, чумыргышо еҥ-влакын чоныштым рÿпшеныт, пурак лекмеш тавалташ таратеныт.

Вес гана «Марий кас» 4 сентябрьыште Чарла Кремльыштак 18 гыч 21 шагат йотке лиеш. Тунам организатор-влак (Республикысе марий тÿвыра рÿдер ден «Чарла Кремль» увер-турист рӱдер) у такмак конкурсым эртарат. 3-4 куплет дене у, шке гыч шонен лукмо але кугезе кова-кочан шондыкшо гыч чылт палыдыме такмакым мурен ончыктыман. Пöлек-влак вучат! Ямдылыза у такмакым!

Автор: Лариса Сидоркина.

4 сентябрьыште 18 шагатлан Чарла Кремльыш
(Йошкар-Ола) марий сем почеш каналташ ӱжына!
Толат? Весела кумыл тыйын лиеш!

• Тӱвыра рӱдер: "Такмак он" конкурсыш ушно! (видео)