«Пеледыш пайрем» лишемеш (ПРОГРАММЕ, ПОЛОЖЕНИЙ, ОРГКОМИТЕТ)

Вход на сайт

emblema_0.jpg21 июньышто Йошкар-Олаште Регион-влак кокласе тӱвыра пайрем – «Пеледыш пайрем» лиеш. Тудо тений «Калык шуко, элна икте» девиз почеш эрта.

Йӱла почеш, пайремыш Марий Эл Республикын тӱрлӧ районжо да марий калыкын тӱшкан илыме моло кундем гыч фольклор ансамбль, уна-влак толыт.

«Пеледыш пайрем» кышкарыште тӱрлӧ конкурс эрта: «Кудо», «Шокталте, гармонь», «Мелна пайрем». Палемдыман: «Мелна пайрем» конкурс тений икымше гана лиеш. Тудым «Саскавий» марий ӱдырамаш ушем темлен, да тидлан чолга ӱдырамаш-влак шкештак вуйын шогат. Тыште тӱрлӧ семын ыштыме мелнам аклаш тӱҥалыт: тамым, рецептым, кузе сийлымым шотыш налыт.

Ончычсо семынак «Пеледыш пайрем» кече Агавайрем дене тӱҥалеш. Кумылан-влак 9 шагатлан Тумер отышто чумыргат.

Калык, мотор марий тувырым чиен, ола мучко коллонно дене ошкыл эрта. А пайрем 12 шагатлан Ленин лӱмеш площадьыште почылтеш. Вара Рӱдӧ паркыште фольклор коллектив-влак шке мастарлыкыштым ончыктат, тыгодымак «Онарын тукымжо» спорт таҥасымаш, конкурс-влак лийыт.

Тиде пагытыштак Сеҥымашын XXX идалыкше лӱмеш тӱвыра полат ончылно йоча-влакым модыш программе вуча. Тыштак 16 шагатлан «Марий кас» лиеш, да тунамак «Шокто, гармонь» конкурс калыкым пырля чумыра.

18 шагатлан пайрем Ленин лӱмеш площадьыш кусна. Тушто «Йыр куштымаш - 2014» калык тӱвыран республикысе почылтшо фестивальже эрта.

Тӱрыс пайрем этнодискотеке дене мучашлалтеш. Тудо 19 шагатлан Ленин лӱмеш площадьыште тӱҥалеш. Касым марий эстраде шӱдыр-влак сӧрастарат.

«Пеледыш пайремым» эртарат: Республикысе марий тӱвыра рӱдер, Я.Эшпай лӱмеш Марий кугыжаныш филармоний, М.Шкетан лӱмеш Марий кугыжаныш драме театр, И.С.Палантай лӱмеш Марий республикысе тӱвыра да сымыктыш колледж, Марий калык конгресс, Марий Эл Радио, Йошкар-Оласе тӱвыра управлений, «Саскавий» марий ӱдырамаш ушем, «Рвезылык» самырыктукым усталык ушнымаш. Пайремын учредительже-влак: Марий Эл Республикысе тӱвыра, печать да клак-влакын пашашт шотышто министерстве, Ялозанлык да кочкыш шотышто министерстве, Мер Каҥаш.

Автор: Эльвира Куклина.

"Пеледыш пайрем" ПОЛОЖЕНИЙ - Скачать.

"Пеледыш пайрем" ОРГКОМИТЕТ - Скачать.

ПРОГРАММА "Пеледыш пайрем" - Скачать.

"Пеледыш пайрем" ПРОГРАММЕ (марла) - Скачать.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.