29 апрельыште Чарла Кремльыште (Йошкар-Ола) «Мый марла ойлем» акций ынде кудымшо гана лийын. Тушко тӱрлӧ ийготан 150 наре еҥ ушнен, тыгак эртен кайыше-влакат «мом тыште ыштат?» манын ончалыныт да нунылан организатор-влак «Руш-марий мутланымаш» буклетым кучыктеныт, акций нерген каласкаленыт. Буклетыш 60 наре ой пурен.

• «Мый марла ойлем» акцийыш ушныза!

А «Мый марла ойлем» акцийым тений икмыняр тӧнеж ден ушем пырля погынен ыштен колтеныт. Тыге Республикысе марий тӱвыра рӱдер йыр «ВийАр» мер организаций, Республикысе Самырык-влакын Правительствышт – калык-влак кокласе кылым вияҥдыме шотышто группо, РФ-ысе Финн-угор университет-влакын студент ден аспирантыштын ассоциацийышт, Марий кугыжаныш университет, Республикысе И.С.Палантай лӱмеш тӱвыра да сымыктыш колледж да Юлкундемысе кугыжаныш технологический университет чумыргеныт. «Чарласе Кремль» тӱвыра да историй комплекс акцийлан верым ойырен, да тудын пеленсе «Волжский путь» историй реконструкций клубат калык ончылно выступатлен.

2014 ийысе акцийын ик эн тӱҥ ойыртемже-влак: сылнымут да куштымаш флешмоб лийын; йот элла гыч Марий кундемыш тунемаш толшо ӱдыр-рвезе-влак ушненыт – икмынярышт шке мастарлыкыштым ончыктеныт; толшо-влак деч Йошкар-Оласе вывескылаште марла йоҥылыш возымым тӧрлаш кидпалым погеныт.

«Мый марла ойлем» акцийын программыжым МарГУ-со «Марий мурсем» ансамбль, самырык мурызо-влак Людмила Фёдорова, Екатерина Шабдарова, Татьяна Чендемерова, Ирина Мамаева, Виктория Тихонова, бард Геннадий Григорьев, мурызо Лариса Сидоркина сӧрастареныт. Почеламут-влакым поэт Геннадий Сабанцев лудын.

Палемдыман, армян эрге Артём Бабаянат шке шочмо йылмыж дене муралтен. Юлкундемысе кугыжаныш технологический университетысе «Кӱвар» («Мост») калык кокласе студент келшымаш клубым вуйлатыше Азнив Мхитарян марла икмыняр ойым палымыжым ончыктен. «Волжский путь» историй реконструкций клубыш коштшо самырык-шамыч дечат вӱдышӧ-влак марий йылмым палымыштым тергеныт. А касым МарГУ-со студент-шамыч Алина Макарова ден Владимир Аптулаев вӱденыт.

Акций годым марий калыкын эртыше илышыж ден тачысе кечыжат ваш тӱкнен. Мутлан, акретсе курым гыч Онар, Айвика, Окавий, Саскавий герой-влак лийыныт.

Уна-влаклан марий калык нерген книга-влакым пӧлеклыме. Нуным Марий книга савыктыш (вуйлатыше – Лидия Ильина) ойырен.

Акцийын шонымашыже шукталтын: шочмо йылмым, калыкын культурыжым арален кодымашке да умбакыже вияҥдымашке шке надырнам пыштыме.

Ик поэт палемден:
Курымла ден пойдаралтше,
Чодыра памаш йӱкан
Шочмо йылме – ош тӱняште
Чоным рӱпшышӧ куан.
Тукым кылын тӱҥ оролжо
Эн акрет дечат акрет
Чумбылатын да Онарын
Ойыштым тачат саклет.

Автор: Эльвира Куклина.