25 апреля в г.Йошкар-Оле (при Марийском государственном университете) состоялся Республиканский фестиваль-конкурс "Ший Талешке", организованный Республиканским центром марийской культуры и Марийским государственном университетом.

Фестиваль Марий талешке кечылан пӧлеклалтын, сандене мероприятий тӱҥалтыште марий калыкын талешкыже-влакым кынел шогал шарналтеныт. Марий кугыжаныш университетын да республикысе И.С.Палантай лӱмеш культур да искусство колледжын ик эн чолга студентышт Марий тӱвыра рӱдерын директоржо Валерий Григорьевын вуйлатымыж почеш талешке-влакын чапкӱшт воктеке пеледышым пыштеныт.

Саламлымаш мутым Марий Эл Республикысе тӱвыра, печать да калык-влакын пашашт шотышто министерствын калык-влак кокласе кыл пӧлкам вуйлатыше Игорь Садовин ойлен.

Фестивальыште чылаже 234 еҥ лийын. Конкурсыш марий талешке-влак нерген 16 паша пурен. Жюрин еҥже-влак тушеч кокытшым ойыреныт. Тиде – Шернур районысо Марийсола школын тунемшыже Андрей Максимовын «Талешке-влак илат чоннаште» да Йошкар-Оласе 14-ше №-ан гимназийын тунемшыже Виктория Ямнееван «А суртышто ныжыл гармонь сем йоҥга» пашашт. Мутат уке, кок паша гыч эшеат сайжым ойыраш куштылго лийын огыл. Конкурсын Положенийже почеш «Ший Талешке» кубокым Викториялан кучымо. Ончыза, лӱмжак ӱдырын могай – Виктория – Сеҥымаш! Андрейынат пашаже оҥай да кумылым савырыше лийын, но тудо палемдыме жап деч кужунрак шуйнен.

«Эн сай технический дизайн» номинацийыште Волжский районысо Сотнур школын тунемшыже Глеб Александровын пашаже, «Эн сай да шкешотан выступлений» номинацийыште Курыкмарий районысо Йоласал школын тунемшыже Валентина Петрован пашашт палемдалтыныт.

Фестиваль кышкареш марий талешке-влаклан пӧлеклалтше «Онар тукым» выставке эртаралтын, тудым МарГУ-н книгагудыжын национальный да краевед литератур пӧлкажын пашаеҥже-влак ямдыленыт.

Конкурсым эртарыше-влак «Ший Талешкыште» сеҥыше-влакым уло кумылын саламлат да ончыкыжымат нунылан сай паша саскам тыланен кодыт, тыгак туныктышо-влаклан тыршымыштлан кугу таум каласат.

Пайрем программым Марий кугыжаныш университетын студентше-влак Алина Макарова ден Владимир Аптулаев вӱденыт. Пайремым самырык артист-влак Ольга Богачёва, Людмила Фёдорова, Татьяна Фоминых, Юлия Медведева, Алина Макарова, «Чинчывий» ден «Шокто, гармонь» ансамлбь-влак сӧрастареныт. Фестивальын паша радамжым чоҥымаште да тудым эртарымаште кугу полышым Финн-угор университет-влакын студент ден аспирантыштын ассоциацийыштын еҥышт пуэныт.
Фестиваль-конкурс «Тачысе кечын талешкыже» темылан «йыргешке ӱстел» дене мучашлалтын.

Кусарен: Геннадий Сабанцев.