Марий тӱвыра рӱдер: Рӱдерын пашаштыже у йӧн (фото)

24 апрельыште Республикысе мер-политик рӱдерыште (Йошкар-Ола) марий карт-влак, муниципал тӱвыра тӧєнежласе фольклор специалист-влак, ялласе тӱвыра пӧрт пашаеҥ-влак погыненыт ыле. Нуно Республикысе марий тӱвыра рӱдерын чумырымо «Кугече – волгыдо кече» усталык апшаткудыш толыныт. Чылаже 86 еҥ лийын. Нунын коклаште самырык-влакат ыльыч, а тидыже тачысе кечын пешак кӱлешан – вет марий калыкын йӱлажым аралымаште да вияҥдымаште тӱрлӧ тукымат тыршышаш.

Усталык апшаткудын пашажым тӱҥалме годым ик гана веле огыл палемдыме: самырык-влак ожнысо йӱлам шукташ тыршат гынат, тудын чыла шӧрынжым огыт пале, шукыжо мондалт толеш. А Марий тӱвыра рӱдерын шонымашыже тыгай – шке пашаштыже тӱрлӧ йӧным кучылтын, калык тӱвыраште, фольклорышто, традиционный манме религийыште улшо шинчымашым ешарен толаш.

Усталык апшаткудым почмо годым Марий Эл Республикысе Тӱвыра, печать да калык-влакын пашашт шотышто министрын алмаштышыже Галина Ширяева тудын чот кӱлешан улмыжым палемдыш. Тудо мане: тыгай апшаткудым Марий тӱвыра рӱдер икымше гана эртара, но пашаште у йӧным кучылтмаш самырык тукымымат ӧрдыжеш кодышаш огыл. Министрын алмаштышыже тиде поро тӱҥалтышлан сай лектышым тыланыш.

Усталык апшаткудын икымше ужашыштыже Кугече пайрем дене кылдалтше пале да йӱла нерген лекций да каласкалымаш лийыныт. Мутлан, Кугече кечылаште тоштыеҥым уштымо йӱла нерген ойленыт, кызытсе жапыште шочшо Кугече йӱла нерген кутыреныт.

Тӱвыра пашаеҥ-влакын ятыр йодышыштлан республикысе тӱҥ онаеҥ Александр Таныгин вашештен. Шанче шинчымаш дене В.М.Васильев лӱмеш МарНИИЯЛИ-н кугурак шанче пашаеҥже Ольга Калинина палдарен.

А марий ӱдырамаш-влакын «Саскавий» ушемыштым вуйлатыше, тӱрызӧ да амалкалче Ираида Степанова Кужэҥер районысо Визым ял калык лӱўм дене карт Вячеслав Актугановлан Кугечын палыжым (символжым) – ташлама коркам – да марий тӱран шарфым кучыктен. Тудо тыгак ӱмаште Тӱня кумалтышым эртараш кӱсотым эрыкташ калыкым лукмылан Леонид Гориновлан таум каласен.

Усталык апшаткудын кокымшо ужашыже практический пашалан пӧлеклалтын – тыште марий калык кухньын ойыртемже нерген ушештареныт, Кугече модышлам ышташ туныктеныт.

Кугече арняште марий калык вес тӱняшке кайыше родо-тукымжо да лишыл еҥже-влакым шарналтен ушта. Ожно годым самырык-влак тыгак Кугече модмашке чумыргеныт, погынен мутланеныт. Ик тыгай йӱлам – «Ташлама коркам» – Советский посёлко гыч «Калыкын чонжо» республик кӱкшытан премий дене палемдалтше «Кугезе кумыл» ансамбль (вуйлатыше – Марий Эл Республикын Почётан гражданинже Галина Щербакова) ончыктен.
Республик кӱкшытан усталык апшатукудышто лийше-влаклан чылаштланат сертификатым кучыктымо.

Кусарен: Геннадий Сабанцев.