Самырык-влакым марий калыкын талешкыже-влак дене палдараш да нунын лӱмыштым кумданрак шарен колташ манын, Марий тӱвыра рӱдер «Ший Талешке» республик кӱкшытан фестивальым эртара. Тушто калык талешке-влак нерген презентаций шотан паша-влак ончыкталтыт, нуно конкурсышто участвоватлаш тӱҥалыт.

Фестиваль кок корнын эртаралтеш: ондак районлаште лиеш, вара республик кӱкшытыштӧ эрта. Кызыт Марий Элысе районла ден олалаште самырык-влак деч конкурсыш ушнаш йодмашым налыт.

Презентацийлык паша-влак икмыняр номинаций дене аклалтыт: эн сай технический дизайн; эн сай усталык паша; эн сай шкешотан выступлений. Паша-влакым марла возыман.

Районласе конкурсышто сеҥыше-влакын презентацийышт 25 апрельыште 10 шагатлан Марий кугыжаныш университетын актовый залыштыже лиеш (1-ше №-ан тунемме корпус – педагогический институтын корпусшо: Кремлёвский урем, 44-ше пӧрт).

Фестиваль-конкурс почылтмо деч вара (10 шагатат 15 минутлан) ик эн чолга тунемше-влак Йошкар-Олаште верланыше Марий Талешке-влакын памятникышт воктеке каят. Нуно тушко пеледышым пыштат.

Чыла презентацийым ончен лекмеке, «Тачысе кечын геройжо» теме дене йыргышке ӱстел эрта. Тиддеч вара конкурсышто сеҥыше-влакым палемдат.

Фестивальым И.С.Палантай лӱмеш республикысе тӱвыра да сымыктыш колледжын «Чинчывий» кӱслезе-влак ансамбльже да Марий кугыжаныш университетын усталык коллективше-влак сӧрастарат.

Конкурсын республик кӱкшытан йыжыҥышкыже ушнаш йодмашым 22 апрель марте электрон почто дене налыт: mari-centr@mail.ru. Тел./факс (8362) 45-88-51.

Фестивальым чумырат да эртарат: Республикысе марий тӱвыра рӱдер; тудлан полшат: Марий Эл тӱвыра, печать да калык-влакын пашашт шотышто министерстве, Туныктыш да шанче министерстве, Финн-угор университет-влакын студент да аспирант-влакыштын ассоциацийышт да Марий кугыжаныш университет.

«Ший Талешке» республик кӱкшытан фестивальын Положенийже - скачать.

Налме вер: http://mari-centr.ru.

Марий талешке кече - 2013 - http://mari-arslan.ru/node/65

Палемдена: Марий Элыште да марий калыкын тӱшкан илыме верлаштышт Марий талешке кечым 26 апрельыште палемдат. Тудо XVI курымышто илыше да шке калыкше верч шогышо тале да патыр Полтыш онын шочмо кундемжын эрыкше верч кучедалмаште колымыж дене кылдалтын. Тиде кечым Марий талешке кече семын официально 1990 ий гыч палемдат, но пайрем 1917 ийыштак шочын.

• Марий талешке кечым молан 26 апрельыште палемдат