25 мартыште 10 шагатлан Йоча да самырык-влакын усталык полатыштышт Республикысе «Пеледше тукым» йоча усталык конкурсын иктешлыше мероприятийже лиеш. Тушто Марий Элысе 29 йочасад гыч 156 икшыве мурымаш да куштымаш мастарлыкшым ончыкташ тӱҥалеш. Чылаже жюри кум номинацийыште 32 номерым онча. Икымше-кумшо верым сеҥен налше-влакым грамот да шергакан пӧлек-влак дене палемдат, чылаштымат сертификат ден тамле пӧлек вучат.

4-19 мартыште Конкурсын икымше этапше эртен. Тушто республикын кажне районысо да оласе 117 йочасад гыч ик тӱжем наре (946 утла) икшыве 196 номерым ончыктен. Нунын мастарлыкыштым икмыняр номинацийыште акленыт: «Мурымаш (шкетын)», «Мурымаш (ансамбль дене)», «Куштымаш».

Тыге Волжск ола ден Волжский район гыч 13 йочасад (100 утла икшыве) 16 номерым ончыктен.

Звенигово ола ден Провой кундем Конкурсыш вич йочасадым (50 икшыве) 14 номер дене луктын.

Совет район гыч – 4 йочасад, 35 икшыве, 6 номер.
Морко район – 9 йочасад, 68 икшыве, 19 номер.
Марий Турек район – 8 йочасад, 44 икшыве, 16 номер.
Шернур район – 11 йочасад, 73 икшыве, 26 номер.
Параньга район – 7 йочасад, 56 икшыве, 16 номер.
Куженер район – 3 йочасада, 15 икшыве, 3 номер.
У Торьял район – 6 йочасад, 50 икшыве, 11 номер.
Оршанке район – 1 йочасад, 9 икшыве, 2 номер.
Козьмодемьянск ден Курыкмарий район – 5 йочасад, 74 икшыве, 14 номер.
Медведево район – 19 йочасад, 204 икшыве, 21 номер.
Килемар район – 1 йочасад, 8 икшыве, 1 номер.
Йошкар-Ола – 25 йочасад, 160 утла икшыве, 31 номер.

«Тӱрлемӱдыр» номинацийыш республикын тӱрлӧ районжо гыч 74 паша пурен. Тудым 25 мартыштак выставкыште ончаш лиеш.

Ушештарена, «Пеледше тукым» конкурс кок ийлан ик гана лиеш да республикысе школласе уста тунемше-влакын «Самырык тукым» конкурсышт дене почела эрта. Кок конкурсшымат ик шонымаш уша – уста икшыве-влакым пален налаш да нуным марий тӱвыра деке чак ышташ.

Але марте «Пеледше тукым» конкурс латкок гана эртаралтын. Тенийсыже «Тӱрлемӱдыр» номинацийым ешарыме дене ойыртемалтеш. Тудын йодмыж дене келшышын, жюри эн сай марий вургемым ойырен палемда, тыгак йоча-влакын шке кид дене але кугурак-влакын да ача-аван полшымышт дене тӱрлымӧ паша-влакым онча. Конкурсышто кум номинаций лиеш: музык дене кылдалтше, куштымашан да тӱрлемӱдыр. Тыгодым шкетын да ансамбль дене выступатлымаш аклалтеш.

«Пеледше тукым» конкурс икымше гана кодшо курымысо 90-шо ийлаште эртаралтын, тудым республикысе Туныктыш да шанче министерстве чумырен. Ондак тушто оласе йоча-влак веле шке моштымашыштым ончыктеныт. Варарак районласе йочасад-влакымат ушымо. Кызыт тиде конкурсым Тӱвыра, печать да калык-влакын пашашт шотышто министерстве, Туныктыш да шанче министерстве да Республикысе марий тӱвыра рӱдер пырля эртарат.

Налме вер: http://mari-centr.ru.

• «Пеледше тукым» кажне районышто уло (фото, видео)