Чынже денак, кеч-куштат кумылым ылыжтен моштышо-влак кӱлыт. Тыгай ойышко шуыч Марий кугыжаныш университет пелен ыштыме ӱчашклубыш толшо еҥ-влак. 19 мартыште клубын черетан погынымашыже тиде вузын конференц-залыштыже эртыш.

Ӱчашклуб ынде пел ий пашам ышта, тылзе еда Республикысе марий тӱвыра рӱдер ден Россий Федерацийысе финн-угор университет-влакын студент ден аспирантыштын ассоциацийышт пырля чумырат. Тушко толшо-влак таче кечылан келшыше пӱсӧ йодышым каҥашымашке луктыт. Тиде гана самырык-влакын канышышт нерген шокшо мутланымаш тарваныш. «Шокшо» манаш лачак келшен толеш, вет ойым вашталтымашке ты проблеме нерген ӧрдыж гыч палаш тӧчышӧ-влак огыл, а тудын рӱдыштыжак илыше-влак ушненыт. Тиде – самырык-влак шкештак. Тӱҥ шотышто студент-влак ыльыч. Нуно Марий кугыжаныш университетыште шинчымашым погат. Российын вес кундемлаж гычат студент-влак ушнышт. Мутлан, Ханты-Мансийск, Ижевск, Петрозаводск олала гыч.

Тарватыме йодыш дене шке кӧргӧ шонымашыштым ӱчашклубышто Людмила Карпова (МарГУ), Лариса Миляхова (Ханты-Мансийск), Марина Романова (Ижевск) раш почын ойлышт. Палемдаш уто огыл, Марина мемнан землячкына, одо ӱдыр Марий Турек районысо Карлыган селаште шочын. Шуко сай ойым да темлымашым Республикысе марий тӱвыра рӱдерын пӧлкажым вуйлатыше Людмила Кошкина ыштыш.

Черетан ӱчашклубышто йодышым каҥашыше-влакын тӱҥ иктешлымашышт тыгай ыле: тений самырык еҥ-влак каныш жапыштым шкалан пайдалын эртараш пешыжак огыт тырше. Дискотеке деч моло вере, мутлан, тӱрлӧ мер пашаште, мероприятийлаште, концерт ден театрлаште нуным шагал ужат. Самырык-влак гражданский обществын чулым еҥышт лийын кушкышт манын, кузе нуным ылыжташ? Тиде йодыш койын-койын проблемыш савырна.

Но ик амал вуйым сакаш ок пу: тачысе самырык калык коклаштат моло-влакым чынже денак ылыжтен моштышо рвезе ден ӱдыр-влак улыт. Нуно у пашам шонен луктыт, тудым илышыш пурташ йолташышт-влакым таратен шогат, нунын чон куатыштым чын корныш виктараш примерым пуат. Тыгай чытамсыр да чулым еҥже шукырак гына лийже ыле.

Ӱчашклубын пашажым МарГУ-н студентше Владимир Аптулаев вӱден. Вес вашлиймаш 25 апрельыште Марий талешке кече вашеш эртаралтеш. Тунам «Тачысе пагытын талешкыже» темым каҥашаш палемдыме. Уло мо тудо, тачысе кечын талешкыже? Толза, шонымашдам почын ойлыза.

Налме вер: http://www.mari-centr.ru.