Шокшо да тутло мелна, йолкурык гыч веселан мунчалтымаш, мурен-куштымаш – чыла тиде Ӱярня пайрем нерген ойла. Пытартыш жапыште йӱлам тукым гыч тукымыш шарен шогымо амал дене йоча-влак денат тыгай пайрем-влакым кумдан эртарат. Мутлан, йоча Ӱярня, йоча Пеледыш пайрем…

28 февральыште Йошкар-Олаште кумшо гана йоча Ӱярня пайрем эртен. Тылеч ончыч уна-влакым кок гана 2-шо №-ан школ вашлийын гын, ынде 14-ше №-ан гимназийыште пайрем гӱжлен. Организатор-влак: Республикысе марий тӱвыра рӱдер ден Йошкар-Оласе шинчымаш кучем.

Пайремышке Йошкар-Оласе кандаш школ (1-ше, 2-шо, 7-ше, 14-ше, 21-ше, 27-ше, 29-ше, 30-шо) гыч 100 утла йоча ден марий йылмым туныктышо-влак чумыргеныт. Нуно тӱрлӧ калык модыш дене модыныт, шкештат южо модышыж дене ваш-ваш модаш туныктеныт. Теве «Эн сай модыш» конкурсышто 2-шо №-ан школ сеҥышыш лектын. Йоча-влак «Ӱярня» модышым ончыктеныт, да тыгодымак чылаштым иктыш ушен, пырля модыктен моштеныт.

Тыгак «Ӱярня курчак» конкурс лийын. Кажне школ шке курчакшым сӧрастарен да калык ончылно тудын нерген сылнын, оҥайын каласкалаш тыршен. Ты конкрусышто 1-ше №-ан школ сеҥен.

Икшыве-влак кондымо мелнашт денат икте-весыштым, уна-влакым сийленыт. Тыште организатор-влак кажныштым Таумут да книга пӧлек дене саламленыт, а конкурслаште сеҥыше-влаклан Чаптанык ден «тамле» пӧлекым кучыктеныт.

Мутат уке, тыгай пайремын акше кугу. Эн ончычак, йочам калык йӱла деке шӱмаҥдена, шочмо йылмынам аклаш туныктена, моло йылман йочамат, йырна поген, шке калык тӱвыра нерген шонаш таратена. Садланак йоча Ӱярня чылт марий йылме дене эртен, но, чаманен каласаш логалеш, ятыр гана рушлат умылтараш пернен. Тидыже – туныктышо-влаклан шоналташ!

Йоча Ӱярня пайремым моткоч чолган Марий кугыжаныш университетын студентше-влак вӱденыт. Кристина Иванова ден Владимир Аптулаев тӱрыс программым виктарен шогеныт гын, Людмила Фёдорова ден Регина Алексеева теле ден шошо роль-влакым модыныт. Ты мероприятийым кӱлеш семын эртарымаште кугу пашам шуктен Республикысе марий тӱвыра рӱдерысе тӱшка паша шотышто пӧлкам вуйлатыше Людмила Кошкина. А тӱвыра рӱдерынак методистше, мурызо Лариса Сидоркина марий муро дене кумылаҥден.

Тиде сай йӱлам умбакыже шуяш да республик кӱкшытышкат лукташ кӱлеш.

Автор: Эльвира Куклина.