Республикысе марий тӱвыра рӱдер пелен Мутланымаш-ӱчашымаш (дискуссионный) клуб пашам ышта. Тушто черетан вашлиймаш 21 февральыште, Шочмо йылмын тӱнямбал кечынже, лиеш. Тудын темыже тыге маналтеш: «Илышыштет – шочмо йылмет». Тидын нерген шке шонымашдам луктын каласаш але ӱчашаш кумылан-влакым Марий кугыжаныш университетын конференц-залыштыже (у тунемме корпусын 216-шо кабинетыштыже) 14 шагатлан вучена.

Мутланымаш-ӱчашымаш клубын погынымашкыже педагогике науко кандидат Валентина Константиновам, «Кугарня» газетын тӱҥ редакторжо Михаил Матвеевым, Марий тӱвыра рӱдерын увер вияҥдымаш да вашкыл пӧлкажым вуйлатыше, журналист да блоггер Эльвира Куклинам, «ВийАр» марий мер организацийын председательже, тележурналист Алёна Ивановам, Марий Эл Республикысе Туризм шотышто комитетын пресс-секретарьже Вера Гордеевам, Марий кугыжаныш университетын шымлызыж ден туныктышыжо-влакым да молымат ӱжмӧ.

Чынжымак, йылме – тиде калыкын чонжо, чонкӧргӧ илышын нигунамат кошкыдымо, эреак тӱзланен шогышо пеледышыже. Лач йылме гоч айдеме шке калыкшын тӱвыражым, эртыме корныжым, йӱлажым тӱрлӧ велымат шижеш да умыла.

Йылме полшымо дене калык тукым гыч тукымыш шке чонкӧргӧ поянлыкшым намия. Шкендан шочмо йылмыда – коча-ковадан, ача-авадан шочмо йылмышт – тыланда шерге гын, тудым аралымашке да вияҥдымашке шке надырдам пыштен кертыда. Тендан темлымашдам мутланымаш-ӱчашымаш клубышто вучена.

Налме вер: mari-centr.ru.