9 февральыште Республикысе марий тӱвыра рӱдер посна программе дене Оршанке кундемышке миен коштын - Пуялыште кугу концерт лийын, а Тошто Крешыныште «Марий кас» калыкым иктыш чумырен.

Сылне кас дене чылаштымат Марий тӱвыра рӱдерым вуйлатыше Валерий Григорьев саламлен да тӱрыс программым шкежак Галина Захарова дене пырля моткоч веселан, чонеш логалшын вӱден.

Касым «Чон оҥгыр» фольклор ансамбль, «У муро» вокал студийым вуйлатыше Геннадий Григорьев, студийыш коштшо самырык артист-влак – Татьяна Чендемерова ден Екатерина Шабдарова да мурызо Владислав Николаев сӧрастареныт.

Калыклан поро вашлиймаш моткоч келшен. Тидым нуно рӱж совым кырымышт дене ончыктеныт, южо мурыж годым шинчавӱдымат луктыныт – теве «Чон оҥгыр» ансамбльын «Сугынь» мурыжым йоҥгалтарыме годым эн кӱэмалтше чонанжат илыш нерген шоналтыде ыш чыте.

А туныктышо Галина Романова тау мутым ойлымыж годым касын интеллектуал шӱлышан улмыжым палемден. Концерт ден каныме кас прогаммеТӱвыра идалык да Марий тӱвыра рӱдерын 15 ияш лӱмгечыж дене кылдалтын, вет нине кок кугу пале иктеш логалыныт - тений палемдалтыт. Тыге вӱдышӱ-влак рӱдерын вияҥме корныштыжо ойыртемалтше посна тат-влакым шарналтен, нуным йӱла дене кылдалтше сценке, фольклор сынан муро да куштымаш, тыгак эстраде сем дене пеҥгыдемденыт.

Марий тӱвыра рӱдерын вес тыгай вашлиймашыже Оршанке район Пуялыштак 20 февральыште (шуматкече) 17 шагатат 30 минутлан лиеш. Тиде кечынак артист-влак Кугунурыш миен шуыт. Тыште концерт 19 шагатат 30 минутлан тӱҥалеш. «Тыланда мемнан поро мутна ден мурына» кас Ачамландым аралыше-влакын кечыштлан пӧлеклалтеш. Касым Лариса ден Геннадий Сидоркинмыт, Роза Искакова, Вадим Краснов сӧрастарат.

Налме вер: http://www.mari-centr.ru.