12 февраль - Коҥга пайрем (Коҥга пазар пайрем)

12 февральыште Коҥга пайрем (Коҥга пазар пайрем) палемдалтеш.

Коҥга ешыште, суртышто шнуй аралтышлан шотлалтын. Ожно коҥгашке тул идалык мучко йӱлен шинчен. А тиде тулжылан шолгымым еҥ-влак шке мӧҥшышкышт кумалтыш гыч конденыт. Тыгодым иктат шке коҥгаж гыч тулым але йӱлышӧ шӱйым пошкудыжлан, йодшо вес еҥлан пуэн огыл. Тыге сурт, еш, вольык, кинде пиал йомеш манын шоненыт. Шочын вочшо азам коҥга ончык пыштен пелештеныт: «Коҥга ава, тиде шочын вочшо аза ӱмбач чыла черым поктен колто, шинча вочмо деч, еҥ кӧраныме дечат аралтышым ыштен шого». Тыге чылажат (осал, чер, шинчавочмыжат) тӱньык гоч лектын кая манын шоненыт. Але аза дене иктаж-кушко кайыме годым, але суртышто шуко еҥ погынен гын, тунам азан саҥгашкыже коҥга шӱчым парня вуй дене йыгалтеныт да пелештеныт: «Коҥга саҥга шӱчлан кунам шинча возын кертеш, тунам гына … (лӱмжым каласат) шинча возын кертше». Айдемын колымекыже, чон лекмыж годым тӱньыкым почыныт, тыге тудын чонжо вес тӱняш кая манын ӱшаненыт.

Пӧртыштӧ коҥга ден юмылук ваш ончат, тыге тул ден сорта тул кокласе кыл шижалтеш. Пайрем годым але еш кумалтышым эртараш марий-влак пайрем кочкышым коҥга тулыш пыштат да пелештат: «Тулава, тулводыж, пӱсӧ йылмет ден кужу шикшет ден, тиде пӧлек дене пырля йодмынам юмо деке намиен шукто (могай юмылан кумалме, тудым каласкалет). Да тулыш кум гана пурам чӱчыктат.

Налме вер: Марий калыкын кечышотшо – 2014.