Кызыт Кечывалвел Венгрийыште, Сегедыште, кокымшо тӱнямбалсе финн-угор телымсе школ эрта.

Шочмын тӱҥалын, икымше февраль марте шуйна. Европо ушемын окса полшымыж дене эртыше кок арняш курсышко тӱрлӧ ЕУ-се эл гыч тунемше-влак толыт, шинчымашым погат, келгемдат. Чылаже тышке Австрий, Германий, Финляндий, Эстоний да Венгрий гыч 36 тунемше погынен.

Чаманен каласыман, тиде школ телымсе маналтеш гынат, Венгрийыште тений нимогай теле уке. Игече леве, йӱран, телын палыжат ок кой. Пиалешна йӱр нерген шонаш она ярсе.

Курсышто шуко теме дене пашам ыштена. Эрдене йылмым туныктена, кечывал деч вара шанче методикым. Икымше арняште тунемше-влак ненец йылмым тунемыт, Хельсинки гыч толшо Лотта Ялава дене. Кокымшо арня – марий арня лиеш.

Марий курслаште ме, туныктышо-влак, кумытын улына: Хельсинки гыч Юлия Куприна, Будапешт гыч Татьяна Ефремова да кумшо мый – Джереми Брэдли, Вена гыч.Тӱҥалше-влаклан олыкмарий курсым эртарена да олыкмарла изиш кутырышо-влаклан курыкмарий йылме дене курсым. Вет тунемше-влакна кокла гыч южо Йошкар-Олаште кеҥежымсе школышто лийын да грамматикым сайын пала.

Марий йылме дене урок-влак тӱҥалын огытыл гынат, методике дене курсышто марий йылме нерген шуко йодыш лектеш.Тунемше-влаклан, кеч-кушеч лийже, тиде йылме поснак оҥай. Марий сем да куштымаш касымат эртараш шонена: марла муралтена, кушталтена. Да ончыкылык кутыраш тӱҥалына: кузе тыште тӱҥалше тунеммашым варарак умбакыже шуяш?

Толшо арнян фотосӱретым, видеом вучен шогыза!

Шокшо салам дене шокшо Сегед ола гыч, Джереми.
Налме вер: http://finnougricwinterschool.wordpress.com