Теле тылзын 4-ше кечынже Ленин лӱмеш тӱвыра полатыште (Йошкар-Ола) «Рвезылык» дискотеке эртен. Тиде кастене 8 шагат гыч 11 шагат марте 170 наре еҥ - самырык ӱдыр-рвезе-влак да кокла ийготан ӱдырамаш ден пӧръеҥ-шамыч, иктеш погынен, мурен-куштен жапым моткоч сайын эртареныт. Ты гана дискотеке курыкмарий тӱвыралан пӧлеклалтын. Палемден кодена: кажне вашлиймаш у темым нӧлталеш.

Касыш толшо-влак тӱрлӧ оҥай модыш дене модыныт. Нунын кумылыштым мурызо-шамыч Александр Веткин, Лена Кучера, Артём Смирнов рӱпшеныт. «Пеледыш» ансамбль курыкмарла куштымаш дене уло залым тавалташ алгаштарен, куштен моштыдымо-влаклан мастер-классым ончыктен. Мо оҥайже, курыкмарий дискотекыш олыкмарий-влакат ятыр погыненыт. Тидыже чоным моткоч куандара. Вет ме чылан ик марий калык улына, сандене чылан пырля ик кугу еш семын илышаш улына. Чынже дене, Марий тӱвыра рӱдерын эртарыме «Рвезылык» дискотекыже тӱрлӧ калыкым пырля чумыраш тырша да оҥай деч оҥай теме дене кылдалтше куштымаш касыш толаш ӱжеш.

Тыге меат, Самырык этножурналист школын участникше-влак, дискотекыште порын канышна. Школ Йошкар-Олаште икымше гана 2-7 декабрьыште эртен.

Дискотеке гыч калык келшымаш шижмаш дене, шулдыраҥше чон дене, весела кумыл дене да волгалтше чурий дене каен. Тыгай вий-куатым тыят налнет – кажне вӱргечын 20 шагатлан Ленин тӱвыра полатыш «Рвезылык» дискотекыш тол.

Автор: Вероника Сергеева.

• Марий дискотеке – Йошкар-Олаште кажне вӱргечын

• Школа молодого этножурналиста в Республике Марий Эл
• АНО "ИНТЕЛЛЕКТУАЛ"
• НОВОЕ ПОКОЛЕНИЕ
• У ТУКЫМ