Кажне гаяк изарнян Марий тӱвыра рӱдер пелен самырык-влак дискуссионный клубыш чумыргат. Тӱҥалтыш жаплан кумылан-влак шукынжак огытыл, но ик эн чолга-влак толыт. Нуно тӱрлӧ йодышым каҥашаш тыршат. Теве эртыше изарнян «Журналист – илыш воштончыш» теме дене мутланаш палемденыт ыле.

Тиде кечын тӱҥ шотышто иктыш чумыргышо кокла гыч кажныже шке аланыштыже ышталтше паша, оҥай увер дене палдарен. Теве Марий Элысе Молодёжь Правительствын еҥже-влак 4 декабрьыште Ленин лӱмеш тӱвыра полатыште Курыкмарий тематикылан пӧлеклалтше «Рвезылык» дискотекым кузе эртарыме нерген ойленыт. Тудо касым «Пеледыш» ансамбль ден мурызо Александр Веткин сӧрастарышаш улыт.

Журналист, блоггер Эльвира Куклина 2-7 декабрьыште эртышаш Самырык этножурналистын школышкыжо пагален ӱжын.

Марий тӱвыра рӱдерыште молодёжь йодышым виктарыше Василий Петров дискуссионный клубын миссийже нерген ойлен. Тудын мутшо почеш, ты клуб тӱрлӧ паша деке кумылан-влакым посна чумырышаш. Теве журналист-влакын клубышт лийшаш, усталык шӱлышан самырык-влак иктеш ушнышаш улыт да тулеч молат.

Кумылан-влакым дискуссионный клубышто пагален вучат!

Автор: Эльвира Куклина.