Ах, кӧ тыйым тыгайым шочыктен?!
Лач ик гана ужмекак, уш каен.
Ме коктын пуйто мужыр йӱксыла
Тачат пырля, эрлат, эре пырля.
Ах, кӧ тыйым тыгайым шочыктен?!
Лач ик гана ужмекак, уш каен.
Ме коктын пуйто мужыр йӱксыла -
Эре пырля.

Мурызо, поэтесса, шкеак семым келыштарыше Татьяна Соловьеван «Ах, кӧ тыгайым шочыктен?!» лӱман у да моткочак сылне CD-дискше ош тӱням ужын. Тушко Татьянан йоҥгалтарыме ятыр у мурыжо пуреныт (чылаже – 16 муро), тыгак кум палыме мурыжлан караоке уло. Диск пеленак – эше плакат, книга…

CD-дискын лӱмжылан «Ах, кӧ тыгайым шочыктен?!» мурын вуймутшым ойырымо. Авторын палемдымыж почеш, тиде мурылан шочаш амалым ик руш муро ыштен. Татьяна Йошкар-Ола урем дене ошкылмо годым мурым колын да тушеч лач «Кто тебя создал такую…» строкам гына шарнен кодын. Тидак тудлан у мурым шочыкташ таратен, да чылт у сынан, руш муро дене кылдалтдыме, марий муро шӱм гыч лектын. Ты произведений авторын шке илышыж дене нигузеат кылдалтын огыл. Тыге вет, поэт, композитор чон кеч-могай айдемылан келшыше шижмашым пален да почеламут, сем гоч почын пуэн мошта.

Татьяна Соловьёван йоҥгалтарыме калык мурыжат ятыр еҥым шонаш таратен, шинчавӱдымат луктын. Тиде муро у дискыш пурен. А самырык мурызын йоҥгалтарыме да самырык поэтын возымо почеламутшо ден семже-влак тӱҥ шотышто тӱрлӧ сынан йӧратымаш дене кылдалтыныт. Ончыкшым тудо шочмо ял нерген мотор мурым возынеже.

У Торъял районын ӱдыржӧ шуко мурыжлан почеламутым да семым шкежат возен. Кузе шкеже ойла, муро ден почеламут ик гана веле огыл пырля шочыныт.

Кок ий жап шонен, келыштарен да чон гыч лукмо сылне диск пелен авторын тыгяак сылне фотож-влак дене сӧрастарыме плакат лектын.
«Чон гыч лекше мурем тыланда пӧлеклем» - возымо диск ӱмбалне да плакатыште. Чынже денак, самырык мурызо кажне еҥлан шке чон шижмашым пӧлекла, кажне колыштшым таушта. Тыге диск, плакат-влак автографан улыт.

Да, эше иктым ешарыман: тенияк, кеҥеж мучаште Татьяна Соловьёван почеламут да муро корнан «Мый тымыкын улам саскаже» у книгаже лектын.
CD-диск 150 теҥге шога, плакат – 30 теҥгеаш, книга – 100 теҥге. Нуным «Марий сувенир» киосклаште налаш лиеш. Йодышым рашемдаш телефон: 36-20-10.

Автор: Эльвира Куклина.