14 -18 октябрьыште Ижевск олаште Самырык этнокультурын III тӱнямбал финн-угор «Палезян» фестивальже эртен. Тушто Марий Эл гыч Марий кугыжаныш универстет пеленсе «Марий мурсем» фольклор ансамбль шке мастарлыкшым ончыктен. Тыгак Удмурт, Венгрий, Эстоний, Финляндий, Ленинград область, Моско ола гыч толшо-влак йӱлашт дене палдареныт.

Тиде фестивальыш ӱжмашым тылзе ондакак налме да вигак ямдылалташ тӱҥалме. Ямдылалтмаш арам лийын огыл, марий-влак сценыште моторын, лывыргын, чын кучен моштымышт дене ойыртемалтыныт. Шокшо вашлиймаш ӱдыр-эрге-влакын шулдырыштым куштен.

Фестивальын икымше кечыже зоопракыш миен коштмо дене тӱҥалын, а вара программе почеш ола мучко экскурсий, кастене гала-концерт эртен. Умбакыже каныме кас финн-угор дискотеке дене шуйнен. Вес кечын Завьялово район Каменный селашке творческий вашлиймашыш кудалме. Тунам «Марий мурсемлан» тале улмыжлан «Окно в небо» VII тӱнямбал фольклор фестивальыш ӱжмашым кучыктеныт. Тыгай вашлиймаш деч вара ӱдыр-эрге-влакым одо национальный кочкышым, перепечым, ышташ туныктеныт. Тутло чесым тамлымеке, Ижевскын келшымаш пӧртышкыжӧ пӧртылыныт, выставке почмаште «Марий мурсем» мурым йоҥгалтарен. Вараже «Чипчирган» студент ансамбль дене вашлийме. Умбакыже «Эктон корка +» мастер-классыште марла кушташ туныктымо.

Пытартыш кечын Каракулино районыш вашкыме. Эн ондак посёлкын мотор верлажым ончен коштмо, историйже дене палыме лийме, тоштерышке, прикладной искусство рӱдерыш пурен лекме. Кастене тиде районын Пыргында ялышкыже кудалме. Тусо марий калыкым концерт дене куандарыме, марий касыште чот куштымо. Тыштыже «Марий мурсемым» кеҥежым Семыкыш толаш ӱжмашым пуэныт. Малаш ялысе еш-влак пуртеныт. А эрлашыжым эрденак корным шочмо элыш виктарыме.

Автор: Людмила Карпова.