21 октябрьыште Йошкар-Олаште «Марийские календарные праздники и обряды» регион-влак кокласе семинар-практикум пашажым тӱҥалын. Тудо вич кече шуйна. Тӱрлӧ сынан вашлиймаш-влак, тӱҥ шотышто, С.Г.Чавайн лӱмеш национальный библиотекыште эртат. Тыгак «Перспективы развития межрегионального сотрудничества» теме нерген Марий Элысе тӱвыра, печать да калык-влак паша шотышто министрын алмаштышыже Галина Ширяева Национальный художественный галерейыште ойлаш тӱҥалеш. А Марий кугыжаныш университетын доцентше Нина Макарова йӱла куштымаш дене практике занятийым Марий кугыжаныш филармонийыште эртара. Российын 8 регионжо да республикын 11 районжо гыч чумыргыжо 42 еҥ Звенигово район Мари-Луговой ялыш да Советский районыш миен толыт, Марий касыште лийыт, Финн-угор калык-влакын кечыштым палемдат.

Семинар-практикумым торжественно почмо годым Галина Ширяева регион-влак кокласе кыл нерген палемдыш. «Ме эреак вес кундемлаште илыше марий-влак нерген шарнена да кертмына семын мо дене гынат (методически, практически, морально) полшаш тыршена. Ме тендам Марий Элыште эреак вучена».

«Йӱла сынан пайремым эртарыме годым калык деке лишкырак лийман, эре сцене гыч ойлен шогыман огыл, пӧрт едат коштман – тыге самырык-шамычым шке деке савыраш йӧнан», - ойлыш Марий Кугыжаныш Погын вуйлатыше алмаштышын полышкалышыже Александр Петров.

Тӱҥ онаеҥ Александр Таныгин мероприятийым, тудым эртарыше-влакым, тушко чумыргышо-влакым поро пашалан сугыньлыш. Тудын мутшо почеш, пашам чылан ыштена, а вот пайремым эртараш эшеат шуко шинчымаш, моштымаш кӱлыт.

Тидымак пеҥгыдемдыш Марий тӱвыра рӱдерым вуйлатыше Валерий Григорьев. Сандене семинар-практикумышто пайрем-влак кокласе ойыртемым ончаш, сценарий-влакым возаш тунемаш тӱҥалыт. Семык, Ӱярня, Кугече, Агавайрем, Агун мелна, Угинде, У пучымыш, Шыже кӱсӧ, Шорыкйол, Марий Эл Республикын кеыже, Марий тиште кече – нине пайремым кузе эртараш кӱлмӧ йодышым тарватат.

Семинар-практикум РФ Тӱвыра министерствын да Марий Элысе тӱвыра, печать да калык-влак паша шотышто министерствын полшымышт дене эрта.

Автор: Эльвира Куклина.