У клуб Татарстан Кӧлегежыште

Вход на сайт

12 октябрьыште Татарстан республик Агрыз район Кӧлегеж ялыште у клубым почыныт. Тушко Марий Эл гыч делегаций миен.

PRrmTKhoBg0.jpg

Республикысе марий тӱвыра рӱдерын специалистше-влак Кӧлегеж кыдалаш школын тунемшыж ден туныктышыжо-влак дене вашлийыныт. Марий пайремым эртарыме нерген Марий Элын сулло артистше, тӱвыра рӱдерын вуйлатышыже Валерий Григорьев ойлен. Фольклор дене пашам ыштыше методист Лариса Сидоркина икшыве-влаклан Шорыкйол, Ӱярня, Кугече годым могай мурым мураш келшыме нерген каласкален. Рӱдерын эше ик пашаеҥже Галина Ласточкина марий юмыйӱла йодышым нӧлталын да школысо книгагудылан ятыр книгам пӧлеклен. XXI курымышто материалым Интернет ден социальный сетьлаште кычалман - пеҥгыдемденыт погынышо-влак да ваш-ваш электрон почто дене кылдалташ да рӱдерын сайтшым эскераш мутланен келшеныт. Вашлиймаш деч вара чыланат ял пайремыш вашкеныт.

Ялысе клуб, фельдшер-акушер пункт да книгагудо, ынде ик верыште верланен, ялысе калыклан пашам ышташ тӱҥалыт. Тыгай чапле пӧлекым марий яллан Татарстан Республикын виктерже «Ялысе инфраструктурым вияҥдымаш» программе почеш ыштен. Тудын почеш кажне ийын яллаште икте деч шагал огыл клубым чоҥат. 2013 ийлан Агрыз районышто кум яллан: Уразаево (татар ял), Сарсак-Омга (одо ял) да Кӧлегеж (марий ял) - йоҥгыдо рӱдерым чоҥеныт. Чоҥыш пашам индеш тылзе жапыште «СтройГрад» фирме тӱрыс шуктен. Агрыз район администраций газ пучым шупшын, тулым да шокшо вӱдым пуртен.

Шуко сомылым шуктышо рӱдерым почаш Татарстан Республикын культур министрын алмаштышыже Гузель Нигматуллина, Агрыз район вуйлатыше Валерий Макаров, «СтройГрад» фирмын генеральный директоржо Ильнур Мифтахиев, Марий Эл республикысе тӱвыра рӱдерын вуйлатышыже Валерий Григорьев, Одо кундем марий-влакын мер ушемым вуйлатыше Анатолий Радыгин, Агрыз районысо райрӱдӧ эмлымверын тӱҥ врачше Андрей Шубин да Агрыз районысо латик ял шотан илемын вуйлатышыже-влак толыныт.

Марий тӱвыра рӱдерын вуйлатышыже Марий Эл Республик вуйлатышын алмаштышыже, тӱвыра, печать да калык-влакын пашашт шотышто министр Михаил Васютинын саламлыме мутшым лудо, ялысе клуб почмо дене саламлыш да у клубышто у сеҥымаш-влакым тыланыш.

Агрыз районын вуйлатышыже Валерий Макаров саламлыме мутыштыжо тыгерак ойлыш: «Марий-влак пурак тӱргалтмеш кушташ йӧратат, садланак кӱваржымат шотанымак пышташ тыршенна, шуко ийлан чытыже». «Шотанже» тыште лач кӱвар гына огыл, фельдшер-акушер пунктшат кызытсе илышлан келыштарыме. Ынде тудо кум ялыште илыше марий-влакым эмлаш тӱҥалеш.

Пайрем годым ялыште илыше-влакым тӱрлӧ номинаций дене палемденыт да шергакан пӧлекым кучыктеныт. «Шуко илыше» номинацийыште палемдыме Анастасия Шуматовна Юмина 90 ийым темен, «Лӱмгечым палемдыше» номинацийыште 85 ияш шочмо кече дене Елисей Иванович Мерзляковым да Кузьма Семенович Ивановым саламленыт.

«Призвание» («Юмо пӱрен») номинацийыште Валентина Николаевна Янбердинам калык шокшын вашлийын. Манаш веле, 540 ий тудын Красноперов-Третьяков тукымжо йоча-влакым туныкта. 1929 ийыште Валентина Ивановнан аваже, Ксения Степановна, Кӧлегеж ялыште тӱҥалтыш школым почын. Туныктышо лийыныт кок акажат, шольыжат, ныл икшывыжат, шешке да кок уныка. Йоҥгыдо залын сценыштыже Валентина Николаевна кушшо тукымлан «кульработниклан тунемаш кайыза» манын сугыньым пуыш.

Валентина Николаевнан эргыже - марий тӱняште чонжо дене тыршыше Мер Каҥаш еҥ, Кӧлегеж школын директоржо, Татарстан республикын тӱҥ онаеҥже Олег Третьяков - «Вдохновение» («Чон ылыжмаш») номинацийыште сеҥыше семын сценыш лектын. Олег Александрович 2012 ийыште школ директорлан шогалын. Ик ий жапыште туныктышо-влак коклаште фольклор ансамбльым поген, тунемше-влакшат марий йылмым тунемыт да кугешнен мутланат. А спорт дене кылым кучымаш нерген ятыр ойлаш лиеш. Тӱрлӧ ийлаште ече дене коштшо-влак дене Кӧлегеж ял калык кугешнен ила. Районышто, республик кӱкшытыштӧ Евгений Шамеев, Алексей Миликанов, Геннадий Орехов да молынат ик гана веле огыл лӱмышт йоҥгалтын. Чылаже 36 еҥ икымше разрядан, мастер спортыш ныл кандидат, коктынжо Российын спорт мастер марте кушкыныт. Пытартыш кум ий нунын дене Евгений Яркеев, Агрыз ДЮСШ-н тренерже, чулымын тырша. Ӱшанена, Кӧлегеж ялыште у школат вашке чоҥалтеш, вет лач тидым Агрыз район вуйлатыше деч ял калык йодын.

Пайрем касым Менделеевск район Элнет ялын уста мурызыжо Елена Мальгина марий куштымаш дене сӧрастарыш. Тудо марий тувыр шочмым, пырчым ӱдымӧ гыч чиен шогалме марте, куштымаш гоч ончыктыш. Татар-влак йол мастарлыкшым шинчам кораҥтыде ончышт. А Лариса Сидоркинан йоҥгалтарыме «Айста муралтен колтена» такмакше почеш Агрыз район вуйлатыше Валерий Макароват кушташ лекте. Пайрем касыште Кӧлегеж ялын «Кече» йочасадыш коштшо-влакат кушташ йӧратымыштым ончыктышт, погынышо калыкын куан шыргыжмашыжым луктыч. Мастарлыкыштым Кӧлегеж ял клубын «Курмузак олык», Буймо ялын «Эр ӱжара» калык ансамбльже, татар мурызо-влак Наиль Тазиев ден Баязид Ахунов, Кодряково ден Красный Бор гыч толшо коллектив-влак ончыктышт.

Татарстаныште илыше марий-влакым тиде пайрем дене шокшын-шокшын саламлена!

Уверым http://chm.mari-centr.ru сайт налме.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.