«Лÿмдам шарнена – кугешнен лудына!» сылнымут флешмоб

2018 ий 27 апрельыште Йошкар-Олаште Марий талешке кечылан пöлеклалтше «Лÿмдам шарнена – кугешнен лудына!» сылнымут флешмоб лийын. Мероприятийым эртарыше-влак, «Саскавий» марий ÿдырамаш ушем, Марий тÿвыра рÿдер, тудын кумдыкшым эшеат шарен колтеныт: марий калыкнан куд талешкыже, куд уста писательже ден поэтше-влакын памятникышт да шарнымаш оҥашт воктене сылнымут пайремым ямдыленыт.

Тиде мероприятийын ик тÿҥ задачыже - самырык-влакым марий сылнымут аланыште тыршыше талешке-влакын произведенийыштым пален, лудын шогаш тараташ. Тыгак марий йылмын поянлыкше дене пайдаланаш, илышыште кучылташ кумылаҥдаш.

Флешмоб кызытсе марий сылнымутын классикше, поэт-новатор Валентин Колумбын шарнымаш оҥаже воктеч тÿҥалын да марий калыкнам уло тÿнялан палымым ыштыше киноартист, поэт Йыван Кырлан памятникше дене мучашлалтын. Тыгак М. Шкетанын бюстшо, Миклай Рыбаков ден Сергей Николаевын шарнымаш оҥашт воктене лийме. Флэшмобыш ушнышо-влак – Йошкар-Оласе 27-ше номеран школын да И.Палантай лÿмеш тÿвыра да сымыктыш колледжын тунемшыже-влак, Марий кугыжаныш университетын студентше-шамыч – марий талешкына-влакын почеламутыштым, произведенийлашт гыч ужашлам лудыныт. Марий Элын калык поэтше Геннадий Сабанцев, поэтессе-влак Альбертина Иванова, Зоя Дудина, Татьяна Пчёлкина, туныктымо пашан ветеранже Римма Катаева, М. Шкетан лÿмеш театрын артистше-влак Павел Ефимов ден Алёна Мочалова, В.Х. Колумб лÿмым нумалше самыр-влаклан библиотекын пашаеҥже Надежда Гордеева, Марий кугыжаныш университетысе научный библиотекын пашаеҥже Галина Корнилова поэт-писатель-влакын илышышт гыч у оҥай факт-влак дене палдареныт.

«Лÿмдам шарнена – кугешнен лудына!» литературный флэшмоб кум шагат чоло шуйнен.

«Саскавий» ÿдырамаш ушем председательын икмше алмаштышыже, Марий кугыжаныш университетын профессоржо Галина Шкалина Сергей Николаевын чапланыше «Салика» пьесыжын тÿҥ геройжо-влакын лÿмыштым Йошкар-Оласе Перинатальный рÿдер ончылно вераҥдыме Еш да йоча пагытлан пöєлеклалтше памятниклан пуаш темлен.

Автор: Анфиса Эманова.
#МариАрслан #РесурсныйЦентр #ШколаЛидераНКО #Тренинг #Семинар
#НКО #Активист #ИлышКуан_РадостьЖизни #Мастер_класс
#Рукоделие #ЦентрРазвитияГармонии #Саскавий #МарийЭл #Мари