«Книга – яллан» поро кумылым ончыктышо акцийыш кажне еҥ ушнен кертеш! Тӱҥ шонымаш: кӱлешан книгам кевытыште налын, але мӧҥгыштӧ аралалтше сай, но оккӱл книга-влакым иктаж ялысе школлан, библиотекылан пӧлеклаш. Тидын дене верысе лудмо да шинчымашым пуышо тӧнежлан могай-гынат полыш лиеш. Книга-влак, тӱҥ шотышто, марла але марий да моло финн-угор калык-влак нерген кӱлыт, историй, научно-популярный ден художественный литературат сай.

«Книга - яллан» поро кумылым ончыктышо акций тений шошым тӱҥале. Тидлан тӱҥалтышым Марий самырык-влакын «ВийАр» ушемышт пыштыш. Самырыкъеҥ-влак икымше гана, тӱрлӧ сынан, тӱҥ шотышто марла возымо да тыгак марий калык нерген книга-влакым поген, Пошкырт кундемыш колтышт. Кызыт тиде акцийыш Республикысе марий тӱвыра рӱдерат ушнен, ынде ушем ден рӱдер эше 200 книгам 9 октябрьыште Шернур районыш намийышт да верысе музей-выставке комплекслан пӧлеклышт. Тиде - учебникым, художественный ден научно-популярный литературым, марий да финн-угор калык-влак нерген книгам.

Тунамак Музей-выставке комплексыште тукым-влак кокласе вашлиймаш эртыш. Тушко Йошкар-Ола гыч «ВийАр-ын» чолга ӱдыр-рвезыж-влак вуйлатышышт Алёна Иванова дене пырля, Марий тӱвыра рӱдерын пашаеҥже Игорь Садовин, «МАРИКИНО» студийыште пашам ыштыше, журналист, блоггер Эльвира Куклина, а верысе кокла гыч Шернур тӱвыра пӧлкам вуйлатыше Августа Швецова, Музей-выставке комлексым вуйлатыше Марина Хабалева пашаеҥже-влак дене пырля да молодёжь паша шотышто районысо пӧлкаште тыршыше Алёна Ямбулатова ушнышт. Нуно самырык-влакым тӱшка пашашке кумылаҥдыме нерген ойлышт, Марий самырыктукым слёт нергенат мутым луктыч да умбакыжат икте-весе дене кылым кучаш, у паша-влакым ворандарен колташ кутырен келшышт.

Мутланымаш деч вара Музей-выставке комплексын пашаж дене палыме лийыч. Оҥай ыле вынерым куымо нерген каласкалыше да ончыктышо выставке. Палемдыман: комплекс пелен коҥган да чыла шотыштат моткоч шокшо пӧрт уло. Тиде пӧртын озаватыже Антонина Шабалина тамле мелна, шудан чай да моло тутло кочкыш дене сийлыш.

Октябрь мучаште «Книга - яллан» поро кумылым ончыктышо акций дене организатор-влак ынде Советский районыш лекташ шонат.

Тидлан акцийым эртарен колташ Шернур район землячестват полшен. А книга-влакым ты гана Юлия Зверева, Алёна Иванова, Наталья Венина, Игорь Садовин да Дмитрй Бердинов пуэныт. "Книга - яллан" акцийыш "Арслан" этнокультурный интернет-журналат ушна. Тиде поро пашашке теат надырдам пыштен кертыда! Телефон: 8-987-720-10-14 (Алёна), 8-963-127-74-67 (Наталья). Книга-влакым Марий тӱвыра рӱдерыш намийыман. Рӱдер Йошкар-Олаште, Сеҥымашын XXX идалыкше лӱмеш тӱвыра полатыште верланен - Марий филармонийын омсашкыже пурыман.

Автор: Эльвира Куклина.