«Кугарня» газетыш унала

Вход на сайт

Самырык этножурналист-влак «Кугарня» газет редакцийыш унала миен коштыныт. Нунылан посна экскурсийым газетын тÿҥ редакторже Эдуард Иманаев эртарен.

«Кугарня» газет – марий калыкын ик эн йöратыме газетше. Тудо 1991 ий 5 июль годсек Марий Элыште да пошкудо кундемлаштат илыше марий калыкым шке кумылжо дене куандарен шога. Тиде жапыште могай гына статья лектын огыл, шуко темым тарватыме: ойганымат, куанлымат. Да тачат кажне кугарнян ялысе калык газетым куанен вуча.

Тÿрлö еҥын тÿрлö койышыжо, илыш умылымашыже – кажныж дене кутырен моштыман. Лач тиде пашам газетыште журналист-влак шуктен шогат. Кызыт газет пелен куд журналист тырша.

Тылеч посна «Кугарня» газет тÿрлö проект дене лудшыжо-влакым куандара. Мутлан, ынде нылымше гана Волжский район Карай ялыште портышкем пайремым эртареныт. «Воштылаш товатат сулык огыл» конкурсым палыдыме еҥже укеат, шонем. Газетыште тыршыше-влак яллашке чÿчкыдын лектын коштыт. Теве пытартыш жапыште йоча-влак дене вашлийме годым нуным марий модыш дене модаш туныктеныт.

«Кугарня» газет концерт-влакым эратара. Йöратыше-влаклан пöлеклалтше концертым налаш – тудо ий гыч ийыш калыкым рÿж чумыра.

Тиде газетыште тыршыше-влаклан кугу деч кугу тау мемнам, самырык этножурналист-влакым, кумылын вашлиймыштлан. Мастарлыкда шуаралт шогыжо, калык да кугыжаныш эреак кÿкшын аклышт!

Вероника Мустаева:
- Мый «Кугарня» газет редакцийыш ятыр гана миен коштынам. Кажне гана тушеч у шонымаш дене, шулдыраҥше кумыл дене пöртылам. Ты гана Этножурналист школын еҥже-влак дене экскурсий дене мийыме. Ӱшанем, самырык этножурналист-влак, опытан журналист-влак дене мутланымеке, ты паша деке утларак шÿмаҥыныт. Чылаштынат пашашт воранен шогыжо!

Кристина Веденеева:
- «Кугарня» газет редакцийыште тыршыше-влак мыланна ятыр сай ой-каҥашым пуэныт. Нунылан моткоч кугу тау!

Анна Смирнова:
- «Кугарня» газет редакцийыш экскурсий дене миен коштмо мылам шуко уым пален налаш полшен. Кунам ме ямде газетым кидыш кучена, огына шоналте, могай кӱжгӧ паша тудым савыктымаште ышталтын. А тиде шуко еҥын моткоч неле да тӱткӧ пашашт да, очыни, омыдымо йӱдыштат. Журналист – эн ондак, тыглай айдеме, тудо герой-влак верч тургыжлана, шӱм-чонжо гоч еҥын ойгыжымат, куанжымат колта. Статьям возымаште келге шинчымаш, грамотность, уш-акыл, чолгалык кӱлыт. Тыгай мастарлык деч посна калыклан оҥай да шонаш таратыше статья-влак огыт шоч. «Кугарня» газет редакцийыште моткоч чолга пашаеҥ-влак тыршат: тӱҥалше журналист-влакат, шуко ий тиде аланыште тыршыше-влакат – чыланат мемнам порын, шокшын да уло кумылын вашлийыныт. Ме чыла йодышланна вашмутым муын кертынна. Тиде вашлиймаш мылам моткоч кугу пайдам конден да журналистика деке утларак пагалымаш кумылым ылыжтен. Газет пашаеҥ-влаклан эре жап дене тӧр ошкылаш логалеш да йокрокланаш тыште пагыт уке, садлан журналист илыш оҥай да эре у событийлан поян. Лач тидыже мыйым ты аланыште шкем тергаш кумылаҥда.


Ольга Мошкина:

- Ме кажне гана, газетым кидыш кучымек, шкаланна шуко кӱлешаным пален налына. А кузе тиде газет лектын, могай паша тудым лукмо деч ончыч ышталтын? Тидын нерген шагал еҥ шоналта. «Кугарня» газет редацийыш экскурсий дене мийыме мыланем моткоч кӱлешан да оҥай ыле. Ме тыште шуко уым пален налынна. Газет чапле, лудшылан оҥай да шонаш таратыше лийже манын, шуко специалист-влак тыршат. Нунын мастарлыкыштлан кӧра ме возышо автор-влакын творчествыштым эскерен кертына. Кызыт шукыжым интернет гоч пален налаш лиеш маныт, но тудым чын газет дене таҥастараш ок лий – печатлыме изданийым кидыш кучен, тудым шижын кертына.

Тыгай оҥай да пайдале экскурсийым эртарымылан кугу таум каласыме шуэш газетын тӱҥ редакторже Иманаев Эдуард Аркадьевичлан. Тудо журналист пашаеҥ-влак, нунын пашашт нерген каласкален, газет лекмаште тыршыше еҥ-влак дене палымым ыштен. Мыланна, ончыклык этножурналист-влаклан, тиде экскурсий пеш пайдале лийын. Кӧ пала, ала иктаж пагыт гыч меат тиде газет лаштыклаште шке пашанам ужын кертына.

Уверым самырык этножурналист Кристина Веденеева ямдылен.
#МариАрслан #финно_угор #ШколаЭтножурналистов #мари
#ШколаМолодогоЭтножурналиста #самырыктукым #марикалык
#ИНТЕЛЛЕКТУАЛ #молодёжь #активнаямолодёжь

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.